१३ जेठ,सुर्खेत-
लेकबेशी नगरपालिका–१ मा निर्माणाधीन सन्त नेता कृष्णप्रसाद भट्टराई स्मृति प्रतिष्ठान अन्तर्गतको बहुआयामिक भौतिक संरचनाको शुक्रबार उच्चस्तरीय टोलीले स्थलगत अनुगमन गरेको छ। अनुगमनमा नेपाल सरकारका पूर्व उपप्रधानमन्त्री तथा पूर्व रक्षा र गृहमन्त्री एवं नेपाली कांग्रेस का निवर्तमान कार्यवाहक सभापति पूर्णबहादुर खड्का, कर्णाली प्रदेशका पूर्व मुख्यमन्त्री जीवनबहादुर शाही, भौतिक पूर्वाधार तथा शहरी विकास मन्त्री शेरबहादुर बुढा, ऊर्जा, जलस्रोत तथा खानेपानी मन्त्री विजया बुढा, प्रतिनिधि सभा सदस्य विष्णुबहादुर खड्का, प्रदेश सभा सदस्य खडकबहादुर पोखरेल लगायत उच्च सरकारी अधिकारी, प्राविधिक टोली तथा स्थानीय सरोकारवालाको उपस्थिति रहेको थियो।
अनुगमनपछि सञ्चारकर्मीसँग कुरा गर्दै पूर्व उपप्रधानमन्त्री पूर्णबहादुर खड्का ले सन्त नेता कृष्णप्रसाद भट्टराई नेपाली लोकतन्त्र, नैतिक राजनीति र जनताको अधिकारका लागि जीवन समर्पण गर्ने ऐतिहासिक व्यक्तित्व भएको उल्लेख गर्नुभयो। उहाँले भन्नुभयो,“कृष्णप्रसाद भट्टराई केवल एउटा राजनीतिक नाम मात्र होइन, उहाँ नेपाली लोकतान्त्रिक आन्दोलनको आदर्श र नैतिकताको प्रतीक हुनुहुन्थ्यो। उहाँको त्याग, संघर्ष र लोकतान्त्रिक मूल्यलाई नयाँ पुस्तासम्म पुर्याउन यस्ता प्रतिष्ठानले महत्वपूर्ण भूमिका खेल्नेछन्।”
खड्काले निर्माणाधीन संरचनालाई केवल स्मृति भवनका रूपमा नभई अध्ययन, अनुसन्धान, विचार विमर्श र लोकतान्त्रिक चेतनाको केन्द्रका रूपमा विकास गर्नुपर्नेमा जोड दिनुभयो। उहाँले कर्णालीको ऐतिहासिक तथा राजनीतिक महत्वलाई अझ उजागर गर्न यस्ता संरचनाले दीर्घकालीन योगदान पुर्याउने विश्वास व्यक्त गर्नुभयो। अनुगमनका क्रममा निर्माण कार्यको प्रगति, गुणस्तर, आवश्यक पूर्वाधार तथा आगामी कार्ययोजनाबारे विस्तृत जानकारी लिइएको थियो। सहभागी नेताहरूले समयमै गुणस्तरीय निर्माण सम्पन्न गर्न सम्बन्धित निकायलाई निर्देशन समेत दिएका थिए। उक्त प्रतिष्ठानलाई बहुआयामिक शैक्षिक, सामाजिक तथा सांस्कृतिक केन्द्रका रूपमा विकास गर्ने लक्ष्य राखिएको जनाइएको छ। संरचना सम्पन्न भएपछि कर्णाली प्रदेशको बौद्धिक, ऐतिहासिक तथा पर्यटन प्रवर्द्धनमा समेत टेवा पुग्ने अपेक्षा गरिएको छ।
