१० जेठ २०८२, सुर्खेत-
गुर्भाकोट नगरपालिकाले असहाय, एकल महिला तथा विपन्न वर्गका नागरिकलाई न्यायमा सहज पहुँच सुनिश्चित गर्ने उद्देश्यले “असहाय तथा विपन्न वर्गको लागि न्यायमा पहुँच” सम्बन्धी कार्यक्रम सम्पन्न गरेको छ। कार्यक्रम गुर्भाकोट नगरपालिकाको सभाहलमा आयोजना गरिएको हो।
कार्यक्रमको अध्यक्षता नगर उपप्रमुख तथा न्यायिक समितिकी संयोजक मैना बिक ले गर्नुभएको थियो भने प्रमुख अतिथिका रूपमा चितेन्द्र बिकको उपस्थिति रहेको थियो। कार्यक्रम सञ्चालन लोकेन्द्र वलीले गर्नुभएको थियो भने स्वागत मन्तव्य चितेन्द्र बिकले व्यक्त गर्नुभएको थियो। कार्यक्रममा न्यायिक समितिका सदस्य हरिमाया घर्ती, वडा सदस्य मिना बिक,इन्द्रा बिक लगायत पालिकाभित्रका असहाय तथा विपन्न वर्गका करिब ४० जनाको सहभागिता रहेको थियो।
प्रमुख अतिथि चितेन्द्र बिकले नगरपालिकाको न्यायिक समितिले असहाय तथा विपन्न वर्गका नागरिकका लागि गर्दै आएका सेवा, सहजीकरण तथा कानुनी पहुँचका विषयमा जानकारी गराउँदै “न्याय सबै नागरिकको आधारभूत अधिकार भएकाले कुनै पनि नागरिक आर्थिक अभावका कारण न्यायबाट वञ्चित हुन नहुने” बताउनुभयो। त्यसैगरी अधिवक्ता गणेश डिसीले असहाय, एकल महिला तथा विपन्न वर्गले कसरी कानुनी सहायता प्राप्त गर्न सक्छन्, न्यायिक प्रक्रियामा कसरी सहभागी हुन सकिन्छ र स्थानीय तहबाट उपलब्ध सेवा–सुविधाको उपयोग कसरी गर्ने भन्ने विषयमा सहजीकरण गर्नुभएको थियो।
कार्यक्रमको अध्यक्ष तथा उपप्रमुख मैना बिकले न्यायमा पहुँच सबै नागरिकको समान अधिकार भएको उल्लेख गर्दै नगरपालिकाले कमजोर तथा पछाडि पारिएका समुदायको संरक्षण र अधिकार सुनिश्चितताका लागि निरन्तर काम गरिरहेको बताउनुभयो। उहाँले “आर्थिक अवस्था कमजोर भएकै कारण कसैले अन्याय सहेर बस्न नपरोस् भन्ने उद्देश्यले न्यायिक समितिले विभिन्न सचेतनामूलक तथा सहजीकरण कार्यक्रम सञ्चालन गरिरहेको” उल्लेख गर्नुभयो। साथै उहाँले स्थानीय सरकार नागरिकको दुःख र समस्यामा सधैं साथमा रहने प्रतिबद्धता व्यक्त गर्नुभयो। कार्यक्रमले असहाय तथा विपन्न वर्गमा कानुनी सचेतना अभिवृद्धि गर्नुका साथै न्यायिक सेवाप्रति विश्वास बढाउन महत्वपूर्ण भूमिका खेलेको सहभागीहरूले बताएका छन्।
