२३ वैशाख, सुर्खेत-
भेरी नदीबाट ढुंगा, गिट्टी र बालुवा जथाभावी उत्खनन हुने क्रम नरोकिएपछि सुर्खेत प्रहरीले सक्रियता बढाएको छ। मापदण्ड विपरीत नदीजन्य पदार्थ उत्खननमा संलग्न सवारीसाधन माथि निगरानी कडा पार्दै प्रहरीले १७ वटा सवारी नियन्त्रणमा लिएको जनाएको छ।
जिल्ला प्रहरी कार्यालय सुर्खेतका अनुसार भेरीगंगा र लेकवेशी नगरपालिकाका विभिन्न स्थानबाट ती सवारीसाधन नियन्त्रणमा लिइएका हुन्। भेरीगंगा नगरपालिका–१३ सालटाकुरा र लेकवेशी नगरपालिका–७ पटारे क्षेत्रमा नदीको बहाव नै असर पर्ने गरी अवैध उत्खनन भइरहेको सूचनाका आधारमा प्रहरी टोली परिचालन गरिएको थियो।
प्रहरी टोली उत्खनन स्थलमै पुगेर कारबाही अघि बढाउँदा १२ टिप्पर, २ ट्याक्टर, २ जेसीभी र १ स्काभेटर नियन्त्रणमा लिइएको जनाइएको छ। जिल्ला प्रहरी प्रमुख सुदिरराज शाहीले कानुनी प्रक्रिया मिचेर गरिएको उत्खननका कारण नदीको प्राकृतिक स्वरूपमा क्षति पुगेको बताउनु भयो।
उहाँका अनुसार नदीजन्य पदार्थ उत्खनन पूर्ण रूपमा प्रतिबन्धित नभए पनि स्थानीय तहले स्वीकृत गरेको वातावरणीय प्रभाव मूल्यांकन (EIA) प्रतिवेदनको पालना अनिवार्य हुन्छ। तर, व्यवहारमा भने निषेधित क्षेत्रमै भारी उपकरण प्रयोग गरेर उत्खनन गरिएको पाइएपछि कारबाही अघि बढाइएको हो।
“निर्धारित मापदण्डविपरीत नदीमै मेसिन प्रयोग गरी उत्खनन गरिएको भेटियो,” प्रमुख शाहीले भन्नुभयो, “नियन्त्रणमा लिएका सवारीसाधनलाई थप प्रक्रिया र कारबाहीका लागि सम्बन्धित पालिकामा बुझाइँदैछ।”
प्रहरीले नियन्त्रणमा लिएका सवारी अब सम्बन्धित नगरपालिकाको जिम्मा लगाइनेछ। अवैध दोहनमा संलग्नमाथि स्थानीय तहले कस्तो जरिवाना वा अन्य कारबाही गर्छ भन्नेबारे भने हालसम्म स्पष्ट जानकारी सार्वजनिक गरिएको छैन।-nepalkarma
