८ चैत,सुर्खेत-
Gen-Z आन्दोलनका क्रममा बाँकेको बाल सुधार गृहबाट फरार भएका लागूऔषध मुद्दाका एक बालकलाई सुर्खेत प्रहरीले नियन्त्रणमा लिएको छ। जिल्ला प्रहरी कार्यालय, वीरेन्द्रनगर सुर्खेतद्वारा जारी प्रेस विज्ञप्तिअनुसार लागूऔषध (ब्राउन सुगर) मुद्दामा कानुनी विवादमा परेका बालक आन्दोलनको बेला नेपालगञ्जस्थित बाल सुधार गृहबाट भागेका थिए।
प्रहरीका अनुसार उक्त बालक वीरेन्द्रनगर नगरपालिका–९ मा लुकीछिपी बसिरहेको भन्ने गोप्य सूचनाका आधारमा प्रहरी टोली परिचालन गरिएको थियो। मंगलबार साँझ करिब ५:२० बजे उनलाई नियन्त्रणमा लिई जिल्ला प्रहरी कार्यालयमा ल्याई बाल निगरानी कक्षमा राखिएको छ।
पक्राउ परेका बालकको नाम कानुनी प्रावधानअनुसार गोप्य राखिएको प्रहरीले जनाएको छ। आवश्यक प्रक्रिया पूरा गरी उनलाई पुनः सम्बन्धित बाल सुधार गृह पठाउने तयारी भइरहेको छ। प्रहरीले फरार अभियुक्तहरूको खोजी तथा नियन्त्रणलाई अझ कडाइका साथ अगाडि बढाइएको बताउँदै कानून उल्लङ्घन गर्ने जो कोहीलाई पनि कारबाहीको दायरामा ल्याइने स्पष्ट पारेको छ।
