७ चैत,सुर्खेत-
सुर्खेतमा एम्बुलेन्स चालकमाथि कुटपिट गर्दै एम्बुलेन्समै तोडफोड गर्ने घटनामा संलग्न तीन जनालाई प्रहरीले पक्राउ गरेको छ। जिल्ला प्रहरी कार्यालय सुर्खेतका अनुसार भेरीगंगा नगरपालिका–११ सादिखोला स्थित कल्याणबाट बिरामी बोकेर नेपालगञ्जतर्फ जाँदै गरेको एम्बुलेन्सलाई बीच बाटोमै रोकी आक्रमण गरिएको हो।
प्रहरीले जारी गरेको प्रेस विज्ञप्तिअनुसार चैत ६ गते राति करिब १०:०५ बजेको समयमा सल्याण कुमाख गाउँपालिका–३ निवासी ३२ वर्षीय चालक बसन्त शर्माले चलाएको एम्बुलेन्सलाई अज्ञात व्यक्तिहरूले रोकेका थिए। उनीहरूले एम्बुलेन्स चालकलाई हातपात गर्दै कुटपिट गर्नुका साथै एम्बुलेन्समा समेत तोडफोड गरेका थिए। घटनापछि चालकले इलाका प्रहरी कार्यालय छिन्चुमा खबर गरेका थिए। सूचना प्राप्त हुनासाथ प्रहरी टोली तत्काल घटनास्थलतर्फ खटिएको थियो। प्रारम्भिक अनुसन्धानका क्रममा सो क्षेत्रमा संलग्न व्यक्तिहरू फरार रहेको पाइएपछि प्रहरीले खोजी कार्य तीव्र बनाएको थियो।
त्यसैक्रममा चैत ७ गते बिहान करिब ०९ :०० बजे पुनः एम्बुलेन्स चालकले फोनमार्फत एम्बुलेन्सको पछाडिको सिसा फुटाइएको जानकारी गराएपछि प्रहरी टोली पुनः घटनास्थलमा पुगेको थियो। त्यसपछि गरिएको अनुसन्धानका आधारमा तीन जना संलग्न व्यक्तिहरूलाई नियन्त्रणमा लिइएको प्रहरीले जनाएको छ। पक्राउ पर्नेहरूमा भेरीगंगा नगरपालिका–११ का २० वर्षीय प्रविण गहतराज, ऐ.का १८ वर्षीय विशाल बि.क. र १९ वर्षीय विशाल बि.क. रहेका छन्। उनीहरूलाई नियन्त्रणमा लिएर इलाका प्रहरी कार्यालय छिन्चु, सुर्खेतमा राखी थप अनुसन्धान भइरहेको छ।
प्रहरीले घटनामा अन्य व्यक्तिहरूको समेत संलग्नता हुन सक्ने आशंका गर्दै थप अनुसन्धान अघि बढाएको जनाएको छ। साथै यस्ता संवेदनशील सेवामाथि आक्रमण गर्ने कार्य गम्भीर अपराध भएको भन्दै दोषीलाई कानुनी दायरामा ल्याइने पनि प्रहरीको भनाइ छ। बिरामी बोकेर गइरहेको एम्बुलेन्समाथि आक्रमण भएको घटनाले स्थानीयस्तरमा त्रास सिर्जना गर्नुका साथै आपतकालीन सेवाको सुरक्षाबारे प्रश्न उठाएको छ। प्रहरीले नागरिकलाई यस्ता गतिविधिबाट टाढा रहन र कुनै पनि शंकास्पद गतिविधि देखिएमा तत्काल जानकारी गराउन अनुरोध गरेको छ।
