२० फागुन, सुर्खेत-
गुर्भाकोट नगरपालिका–१३ स्थित बेतेनी खोलामा सडक निर्माणका लागि बनाइएको पानी जमेको पोखरीमा डुबेर एक बालकको ज्यान गएको छ। गुमी पाम्केली टोल निवासी दीपक बुढा र सुनिता बुढाका ७ वर्षीय छोरा सुदीप बुढा खेल्ने क्रममा उक्त पोखरीमा डुबेका हुन्। सडक निर्माणका क्रममा बनाइएको अस्थायी पोखरीमा जमेको पानी निकाल्न जाँदा बालकको डुबेर मृत्यु भएको जिल्ला प्रहरी कार्यालय सुर्खेतका प्रवक्ता एवं सुचना अधिकारी मोहनजंग बुढथापाले जानकारी दिनुभयो।
घटनापछि स्थानीयवासीले तत्काल उद्धार गरी उपचारका लागि स्वास्थ्य संस्थामा पुर्याए पनि चिकित्सकले उनलाई मृत घोषणा गरेका थिए। शवको प्रहरी मुचुल्का तयार गरि पोस्ट मार्टमको लागि मेहेलकुना अस्पतालमा रखिएको बताइएको छ। प्रहरीका अनुसार घटनाबारे आवश्यक अनुसन्धान भइरहेको छ। निर्माणाधीन स्थल आसपासमा बालबालिका नजान सचेतना अपनाउन स्थानीय प्रशासनले आग्रह गरेको छ।
