१८ फागुन, सुर्खेत
यही फागुन २१ गते हुने प्रतिनिधि सभा निर्वाचनलाई लक्षित गर्दै नेपाली कांग्रेसले गुर्भाकोट नगरपालिकामा भव्य चुनावी आमसभा सम्पन्न गरेको छ। निर्वाचन आचारसंहिताअनुसार प्रचारप्रसारका लागि तोकिएको समय आज राति १२ बजेसम्म मात्र भएकाले मौन अवधिको अन्तिम दिन कांग्रेसले आमसभा तथा र्याली मार्फत आफ्नो चुनावी अभियान सम्पन्न गरेको हो।
गुर्भाकोटमा आयोजित उक्त आमसभामा प्रतिनिधि सभा सदस्य पदका प्रत्यक्ष उम्मेदवार विष्णुबहादुर खड्का, कर्णाली प्रदेश सभा सदस्य खड्कबहादुर पोख्रेल, बलिमाया बुढा लगायत प्रदेश, जिल्ला, स्थानीय तह तथा वडास्तरका सभापति एवं नेता–कार्यकर्ता तथा शुभेच्छुकहरूको उल्लेख्य सहभागिता रहेको थियो। कार्यक्रमलाई सम्बोधन गर्दै उम्मेदवार विष्णुबहादुर खड्काले लोकतन्त्र, विकास र स्थायित्वका लागि कांग्रेसको नेतृत्व आवश्यक रहेको बताउनु भयो । उहाँले भन्नुभयो , “हामीले सुरुआत गरेका विकासका कामलाई अधुरो छाड्नु हुँदैन। अबको पाँच वर्ष रोजगारी सिर्जना, सडक पूर्वाधार विस्तार, शिक्षा र स्वास्थ्य सुधारमा केन्द्रित हुनेछ।”
खड्काले युवालाई स्वदेशमै अवसर सिर्जना गर्ने, कृषि आधुनिकीकरणलाई प्राथमिकता दिने र क्षेत्र नम्बर १ लाई आर्थिक रूपमा सुदृढ बनाउने प्रतिबद्धता व्यक्त गर्दै भन्नुभयो, “रुख चिन्हमा तपाईंहरूको मतले मात्रै समृद्ध क्षेत्रको सपना साकार हुन्छ,”। अन्य वक्ताहरूले पनि कांग्रेसको नीति तथा कार्यक्रम जनमुखी रहेको दाबी गर्दै प्रतिनिधि सभा सदस्य पदका उम्मेदवार विष्णुबहादुर खड्कालाई विजयी गराउन क्षेत्र नम्बर १ का आमाबुवा, दाजुभाइ तथा दिदीबहिनीहरूसँग अपिल गरेका थिए। मौन अवधिको पूर्वसन्ध्यामा सम्पन्न उक्त आमसभालाई गुर्भाकोटमा कांग्रेसको शक्ति प्रदर्शनका रूपमा हेरिएको छ। निर्वाचनको मिति नजिकिँदै जाँदा दलहरूबीच प्रतिस्पर्धा थप रोचक बन्दै गएको छ।
