१९ माघ, सुर्खेत-
वीरेन्द्रनगर नगरपालिकाको आयोजना तथा श्री शिव माध्यमिक विद्यालय धुलियाविट, वीरेन्द्रनगर–११ सुर्खेतको सहआयोजनामा मिति २०८२ माघ १७ गतेदेखि सञ्चालन भएको आठौं नगर स्तरीय राष्ट्रपति रनिङ शिल्ड छनौट खेलकुद प्रतियोगिता आज भव्यताका साथ सम्पन्न भएको छ। नगरभित्रका विद्यालयहरूबीच खेलकुद प्रतिभाको पहिचान, खेल संस्कृतिको विकास र विद्यार्थीहरूमा अनुशासन, सहकार्य तथा प्रतिस्पर्धात्मक भावना अभिवृद्धि गर्ने उद्देश्यले आयोजित प्रतियोगितामा भलिबल, कबड्डी, एथलेटिक्स तथा मार्शल आर्ट लगायतका विधामा उत्साहजनक सहभागिता रहेको थियो। शिव माध्यमिक विद्यालय धुलियाविट वीरेन्द्रनगर ११ सह–आयोजना तथा वीरेन्द्रनगर नगरपालिकाको आयोजनामा प्रतियोगिता सम्पन्न भएको हो। प्रतियोगितामा जम्मा ४५ विद्यालय सहभागी रहेका थिए , जसमध्ये २४ सामुदायिक र २१ संस्थागत विद्यालय थिए ।
प्रतियोगितामा SOS हर्मन माइनर प्रथम स्थान हासिल गर्न सफल भयो भने श्री नेरा मावि वीरेन्द्रनगर द्वितीय र श्री शिव मावि लाटिकोइली तृतीय स्थान प्राप्त गर्न सफल भएका छन्। विभिन्न विधामा उत्कृष्ट प्रदर्शन गर्ने तथा सहभागी सम्पूर्ण विद्यालय र खेलाडी विद्यार्थीहरूलाई आयोजकले हार्दिक बधाई ज्ञापन गरेका छन्। कार्यक्रम सफल बनाउन दिनरात खटिएका शिक्षक–कर्मचारी, विद्यालय व्यवस्थापन समिति, शिक्षक अभिभावक संघ, विद्यार्थी, खेल संयोजक तथा रेफ्रीहरूको महत्वपूर्ण भूमिका रहेको थियो। साथै नगर प्रमुख, उपप्रमुख, वडा अध्यक्ष, शिक्षा, युवा तथा खेलकुद शाखा, सहभागी विद्यालयका प्रअ तथा शिक्षकहरू, स्थानीय अभिभावक, व्यवसायी, समाजसेवी र सुरक्षाकर्मीहरूको साथ र सहयोगले कार्यक्रम थप व्यवस्थित र सफल बनेको आयोजक पक्षले जनाएको छ।
सह–आयोजकको भूमिका निर्वाह गरेको श्री शिव मावि धुलियाविट प्रति विशेष आभार व्यक्त गर्दै, प्रतियोगितालाई सफलतापूर्वक सम्पन्न गर्न सहयोग पुर्याउने सम्पूर्ण व्यक्ति तथा संस्थाप्रति आयोजकले कृतज्ञता प्रकट गरेको छ। यस प्रकारका खेलकुद प्रतियोगिताले विद्यार्थीहरूमा लुकेका प्रतिभा उजागर गर्नुका साथै स्वस्थ, अनुशासित र ऊर्जावान समाज निर्माणमा टेवा पुग्ने विश्वास गरिएको छ।
