सल्यान २० ,
सल्यानको राप्ती लोकमार्ग अन्तर्गत कपुरकोट गाउँपालिका ३ मुलपानी नजिक भएको दुर्घटनामा दुई जनाको मृत्यु भएको छ भने २१ जना घाईते भएका छन्। मृत्यु हुनेमा सल्यानको त्रिबेणी गाउँपालिका ६ निवासी ४४ वर्षीया अनिता बोहरा र दाङ तुलसीपुर ६ निवासी ३२ वर्षीया सुनिता सुनार रहेका छन्। उनीहरुको घटनास्थलमै मृत्यु भएको जिल्ला प्रहरी कार्यालय सल्यानले जनाएको छ । बस सडकबाट खस्ने बित्तिकै एउटा रुखमा ठोक्किएको र त्यसपछि भिरालो जमिनमा पल्टिदै तल पुगेको यात्रुहरुको भनाइ छ । दाङ तुलसीपुरबाट सल्यानको छत्रेश्वरी गाउँपालिका झिम्पे जयचौर तर्फ आउँदै गरेको ना ६ ख ५४६३ नम्बरको दिउँसो ३ बजेतीर दुर्घटनामा परेको थियो । यात्रुका अनुसार अगाडीको गाडीलाई ओभरटेक गर्नेक्रममा सडक छेउमा टायर चिप्लिएर बस पल्टिएको हो । दुर्घटनामा परेर घाईते भएका २१ जना मध्य दुई जनाको अवस्था गम्भीर रहेको छ । गम्भीर घाइते हुनेमा छत्रेश्वरी गाउँपालिका चार निवसी ३५ वर्षका कमान सिंह र ठेगाना नखुलेका ३५ वर्षीय बिनोद श्रेष्ठ रहेको जिल्ला प्रहरी कार्यालय सल्यानका प्रवक्ता एवल ईन्स्पेक्टर गोपाल श्रेष्ठले जानकारी दिनु भयो ।
अन्य घाइतेहरुमा शारदा नगरपालिका १० निवासी चालक २६ वर्षीय मेघराज कुँवर, त्रिबेणी गाउँपालिका ६ निवासी ६० वर्षीय प्रेम बहादुर बुढा र ४५ वर्षीया पुष्पा बुढा रहेका छन् । यस्तै त्रिवेणी गाउँपालिका ६ निवासी २७ वर्षीया माया राना, तुलसिपुर ९ बस्ने वर्ष २० का प्रमोशन रिजाल, छत्रेश्वरी ४ बस्ने वर्ष ५० का चित्र डाँगी, त्रिवेणी लुहाम बस्ने २१ वर्षिय कुमारी चन्द, छत्रेश्वरी ४ बस्ने वर्ष २६ का रुपा विक, त्रिवेणी ६ का विनोद शाहु, छत्रेश्वरी ४ का देवा विक, त्रिवेणी ६ का ३३ वर्षिय होम बहादुर वस्नेत, सोही ठाउँ निवासी धनी वस्नेत रहेका छन् । अन्य घाइतेहरुमा छत्रेश्वरी ३ का वर्ष २४ का खडक विक, त्रिवेणी ६ का ३१ वर्षिय कृष्ण बहादुर वोहरा, छत्रेश्वरी ४ का २३ वर्षिय दोभान खड्का, ३५ वर्षिय दल बहादुर, दांग तुलसिपुरका १८ वर्षिय कमल सुनार, शारदा नगरपालिका २ बस्ने २२ वर्षिय प्रतिभा कुवर र छत्रेश्वरी ४ बस्ने १८ वर्षिय सरिता केसी रहेको ट्राफिक प्रहरीले जनाएको छ । घाईतेहरुको दांगमा उपचार भइरहेको छ ।
पछिल्लो समय सल्यानमा सवारी दुर्घटनामा बृद्धि भएको छ । गत असोज १२ मा पनि छत्रेश्वरी गाउँपालिकाको भित्री सडकमा जीप दुर्घटना हुँदा दुई जनाको मृत्यु भएको थियो भने १४ जना घाइते भएका थिए । यस्तै १७, असोजमा पनि बनगाड कुपिण्डे नगरपालिकामा अटो दुर्घटनामा परी चार जना घाइते भएका थिए ।
