११ वैशाख,कैलाली-
दाङ घर भई हाल अमेरिकामा बसोबास गर्दै आउनु भएका मोतीलाल के.सीको आर्थिक सहयोग तथा पवित्रा खड्काको समन्वय कैलालीका बर्दगोरिया र भजनी गौशालामा घाँस–पराल तथा पशु आहार हस्तान्तरण गरिएको छ । सहयोग अन्तर्गत ९ ट्र्याक्टर पराल, ३ क्विन्टल दाना (ब्रान्ड) र १ क्विन्टल नुन हस्तान्तरण गरिएको हो । जसमध्ये ३ ट्र्याक्टर पराल बर्दगोरिया गौशालालाई प्रदान गरिएको थियो भने बाँकी सामग्री भजनी गौशालामा हस्तान्तरण गरिएको लायन्स क्लब अफ छिन्चु सुर्खेत अध्यक्ष रिता खड्का रोकायले बताउनु भयो।
हस्तान्तरण कार्यक्रममा बोल्दै लायन्स क्लब इन्टरनेसनल ३२५ एन नेपाल एरिया–३ का एरिया चिफ लायन पवित्रा खड्काले कैलालीका गौशालामा गाईगोरु भोकै रहेको समाचार सञ्चारमाध्यममा आएपछि केसीले सहयोग गरेको बताउनु भयो। उहाँले मानवीय सेवाभावले यस्तो सहयोग अभियान अघि बढाइएको उल्लेख गर्नुभयो।
कार्यक्रममा भजनी नगरपालिकाकी उप–प्रमुख राजु तिरुवाको उपस्थितिमा सामग्री हस्तान्तरण गरिएको थियो । उप–प्रमुख तिरुवाले सहयोगी दाता मोतीलाल के.सी. तथा समन्वयकर्ता लायन्स क्लब छिन्चु सुर्खेतप्रति धन्यवाद व्यक्त गर्दै आगामी दिनमा थप सहयोगको अपेक्षा समेत गर्नुभयो। पराल बदियाबाट रमेश वलीको समन्वयमा त्यहाँ पुयाइएको बताइएको छ । गौशालामा चारा अभाव भइरहेका बेला गरिएको यस सहयोगले पशु संरक्षणमा महत्वपूर्ण राहत पुगेको स्थानीयले बताएका छन् ।
