२३ चैत, सुर्खेत –
गुर्भाकोट नगरपालिकामा लामो समयदेखि समुदायको स्वास्थ्य सेवामा समर्पित रहँदै आउनुभएका महिला सामुदायिक स्वास्थ्य स्वयंसेविका (FCHV) हरूको सम्मान तथा विदाइ कार्यक्रम भव्य रूपमा सम्पन्न भएको छ। ६० वर्ष उमेर पूरा गरी सेवाबाट विदा हुनुभएका स्वयंसेविकाहरूमा वडा नम्बर १२ की मायादेवी घर्ति, वडा नम्बर ४ की रत्ना कुमारी वली, वडा नम्बर ६ की शितली केसी र वडा नम्बर ११ की रुपिसरा राना रहनुभएको छ।
नगर प्रमुख हस्त पुनको प्रमुख आतिथ्यता,उपप्रमुख मैना विक र प्रमुख प्रशासकीय अधिकृत कृष्ण प्रसाद पोख्रेलको आतिथ्यतामा सम्पन्न उक्त कार्यक्रममा उहाँहरूको स्वास्थ्य क्षेत्रमा पुर्याउनुभएको दीर्घकालीन, निःस्वार्थ तथा अमूल्य योगदानको उच्च कदर गरिएको थियो। नगरपालिकाको कार्यविधि अनुसार प्रत्येक स्वयंसेविकालाई सम्मानपत्रसहित जनही रु. ५०,००० (पचास हजार रुपैयाँ) प्रोत्साहन रकम प्रदान गरिएको स्वास्थ्य शाखा प्रमुख पूर्ण बहादुर घर्तीले जानकारी दिनुभयो।
कार्यक्रममा नगर उपप्रमुख मैना बि.क., प्रमुख प्रशासकीय अधिकृत कृष्ण प्रसाद पोख्रेल,स्वास्थ्य शाखा प्रमुख पूर्ण बहादुर घर्ति,विभिन्न वडाध्यक्ष, कार्यपालिका सदस्य, कर्मचारीको उल्लेखनीय उपस्थिति रहेको थियो। विदाई कार्यक्रममा स्वास्थ्य शाखा प्रमुख पूर्ण बहादुर घर्तीले स्वयंसेविकाहरूले ग्रामीण स्तरमा स्वास्थ्य सचेतना फैलाउन, खोप अभियान सफल बनाउन तथा मातृ–शिशु स्वास्थ्य सुधारमा पुर्याएको योगदानको प्रशंसा गर्नु भएको थियो।
यस्तै कार्यक्रममा नगर प्रमुख हस्त पुनले स्वयंसेविकाहरूको योगदान सदैव स्मरणीय रहने उल्लेख गर्दै आगामी जीवन सुखद, स्वस्थ र सम्मानजनक रहोस् भन्ने शुभकामना व्यक्त गर्नुभयो। साथै, नगर उपप्रमुख मैना बिकले पनि उहाँहरूको सेवाभाव, समर्पण र समुदायप्रतिको जिम्मेवारीको उच्च मूल्यांकन गर्दै धन्यवाद ज्ञापन गर्नुभएको थियो। दीर्घकालीन सेवापछि विदाइ हुनुभएका स्वयंसेविकाहरूले आफूले गरेको सेवा नगर र समुदायले कदर गरेकोमा खुशी व्यक्त गर्दै आगामी दिनमा पनि समाजसेवामा निरन्तर लागिरहने प्रतिबद्धता व्यक्त गर्नुभयो।
