२ चैत, सुर्खेत-
चैत १ गते आएको हावाहुरीका कारण गुर्भाकोट नगरपालिका–६ स्थित जनसेवा आधारभूत विद्यालयमा ठूलो क्षति पुगेको छ। हावाहुरीले विद्यालयको छानामा राखिएका जस्तापाता उडाउँदा विद्यालयको छाना पूर्णरूपमा प्रभावित भएको जनाइएको छ। घटनापछि आज वडा नम्बर ६ का वडाअध्यक्ष गोविन्द ओलीले विद्यालय पुगेर स्थलगत अनुगमन गर्नुभएको छ। अनुगमनका क्रममा उहाँले विद्यालयको क्षतिको अवस्था अवलोकन गर्दै आवश्यक मर्मत कार्य छिट्टै सुरु गरिने जानकारी दिनुभयो।
वडाअध्यक्ष ओलीका अनुसार जस्तापाता माथि आड दिने वा च्याप्ने खालका ढुंगा राखिनुपर्नेमा विद्यालयले तारले मात्र बाँधेको हुँदा हावाहुरीले सजिलै उडाएको देखिएको बताउनुभयो। सामान्य सावधानी नअपनाउँदा यस्तो अवस्था आएको उहाँको भनाइ छ। स्थानीयका अनुसार अघिल्लो वर्ष आएको हावाहुरीले पनि सोही विद्यालयको छानामा रहेका जस्तापाता उडाएर ठूलो क्षति पुर्याएको थियो। पटक–पटक प्राकृतिक विपत्तिका कारण विद्यालयको भौतिक संरचनामा क्षति पुग्दै आएकाले दीर्घकालीन समाधानतर्फ ध्यान दिनुपर्ने स्थानीयहरूको माग रहेको छ। वडाअध्यक्ष ओलीले विद्यालयको भौतिक संरचना सुधार तथा मर्मत कार्यलाई प्राथमिकतामा राखेर आवश्यक पहल गरिने बताउनुभएको छ।
