३० फागुन, सुर्खेत-
सुर्खेतको लेकवेशी नगरपालिका गरसभाको १८औँ अधिवेशन सम्पन्न भएको छ। अधिवेशनले आर्थिक वर्ष २०८२/८३ का लागि संशोधित बजेट तथा कार्यक्रम सर्वसम्मत रूपमा पारित गरेको छ। नगर उपप्रमुख बिमला खड्लुकले नगरसभामा प्रस्तुत गरेको संशोधित बजेट तथा विभिन्न योजनासम्बन्धी प्रस्तावमाथि विस्तृत छलफलपछि सर्वसम्मत रूपमा पारित गरिएको हो।
अधिवेशनले १७औँ नगरसभापछि हालसम्म नगर कार्यपालिकाको बैठकबाट पारित भएका कार्यविधि, मापदण्ड तथा विभिन्न निर्णयहरूलाई पनि अनुमोदन गरेको छ। साथै केही वडागत योजनाहरू कार्यान्वयन हुन नसकेकाले आवश्यक रकमान्तर समेत गरिएको जनाइएको छ। नगरपालिकाले सीमित स्रोत–साधनलाई समानुपातिक र न्यायोचित ढंगले वितरण गर्दै अधिकतम प्रतिफल दिने योजनाहरूलाई प्राथमिकतामा राख्ने नीति लिएको जनाएको छ। सोहीअनुसार आगामी कार्यक्रम तथा योजनाहरू तर्जुमा गर्ने विषयमा पनि अधिवेशनमा जोड दिइएको थियो।
नगर प्रमुख उमेश कुमार पौडेलको अध्यक्षतामा सम्पन्न अधिवेशनमा नगर उपप्रमुख बिमला खड्लुक, प्रमुख प्रशासकीय अधिकृत महेन्द्र कुमार शर्मा, वडा अध्यक्षहरू, कार्यपालिका सदस्यहरू तथा सम्बन्धित कर्मचारीहरूको सहभागिता रहेको थियो। अधिवेशनमा नगरपालिकाको समग्र विकास, नीति तथा कार्यक्रम, बजेट कार्यान्वयनको अवस्था तथा आगामी योजनाबारे विस्तृत छलफल गरिएको थियो। साथै सुशासन प्रवर्द्धन, सेवा प्रवाहलाई प्रभावकारी बनाउने तथा स्थानीय विकासलाई थप सुदृढ गर्ने विषयमा महत्वपूर्ण निर्णयहरू गरिएको नगरपालिकाले जनाएको छ।
