१९ फागुन, सुर्खेत-
सुर्खेतको भेरीगंगा नगरपालिका–१० राताचौर अन्तर्गत पर्ने छिन्चु–जाजरकोट सडकखण्डमा मंगलबार बिहान शंकास्पद वस्तु फेला परेपछि केहीबेर स्थानीय क्षेत्रमा त्रास फैलिएको छ।
इलाका प्रहरी कार्यालय छिन्चु का अनुसार बिहान करिब १० बजेतिर सडक छेउको नालामा रातो प्लास्टिकले बेरिएको प्रेसर कुकर र त्यसै नजिकै अर्को रातो प्लास्टिकको पोका भेटिएको हो। उक्त पोकामा ‘खतरा’ लेखिएको देखेपछि स्थानीयले प्रहरीलाई खबर गरेका थिए। सूचना पाएलगत्तै प्रहरी निरीक्षक प्रकाश के.सी.को नेतृत्वमा सात सदस्यीय टोली घटनास्थल पुगेको थियो। सुरक्षालाई प्राथमिकता दिँदै प्रहरीले सो क्षेत्रलाई घेराबन्दी गरेर सर्वसाधारणको आवतजावत अस्थायी रूपमा रोकेको जनाएको छ।
घटनास्थल इलाका प्रहरी कार्यालयबाट करिब तीन किलोमिटर उत्तरतर्फ पर्छ। वस्तुको वास्तविक प्रकृति पहिचान गर्न नेपाली सेनासँग समन्वय भइरहेको र आवश्यक सुरक्षा सावधानी अपनाइएको प्रहरीको भनाइ छ। हालसम्म कुनै मानवीय वा भौतिक क्षतिको विवरण प्राप्त नभएको जनाइएको छ। घटनाबारे थप अनुसन्धान जारी रहेको प्रहरीले जानकारी दिएको छ।
