१६ माघ, सुर्खेत-
सुर्खेत क्षेत्र नम्बर १ बाट प्रतिनिधिसभा सदस्यका उम्मेदवार ध्रुव कुमार शाहीले सुर्खेत क्षेत्र नं. १ मा पूर्वाधार निर्माणपछि अबको चरण रोजगारी, कृषि, डिजिटल प्रविधि, शिक्षा र स्वास्थ्यमा केन्द्रित हुने बताउनु भएको छ। “विदेश होइन, आफ्नै भूमिमा अवसर” भन्ने मूल नारासहित उहाँले रोजगारीमुखी कार्यक्रमलाई प्राथमिकता दिने घोषणा गर्नु भएको हो।
“विदेश होइन, आफ्नै भूमिमा अवसर”:
शाहीले हालसम्म सडक, खानेपानी र आधारभूत संरचना निर्माणमा उल्लेखनीय काम भएको दाबी गर्दै अब उद्योग स्थापना, सीपमूलक तालिम र स्वदेशमै रोजगारी सिर्जना आफ्नो मुख्य लक्ष्य रहेको बताउनु भयो। उहाँले वैदेशिक रोजगारीबाट फर्केकाहरूका लागि पुनःस्थापना योजना ल्याउने, युवालाई स्वरोजगारतर्फ प्रेरित गर्ने तथा कृषि आधुनिकीकरण कार्यक्रमलाई विस्तार गर्ने प्रतिबद्धता जनाउनु भएको छ।
“हरेक घरमा धारा, हरेक खेतमा पानी”:
खानेपानी र सिँचाइलाई दीर्घकालीन प्राथमिकता दिँदै शाहीले प्रत्येक वडामा सुरक्षित खानेपानी पुर्याउने लक्ष्य सार्वजनिक गर्नुभयो। अधुरा खानेपानी आयोजना समयमै सम्पन्न गर्ने, सिँचाइ कुलो तथा लिफ्ट सिँचाइ विस्तार गर्ने र किसानलाई १२ महिना पानीको सुनिश्चितता दिने योजना उहाँले अघि सार्नु भएको छ।
“सडक जोड्यौं, अब समृद्धि जोड्छौं”:
सडक तथा यातायात पूर्वाधार सुदृढीकरणमार्फत आर्थिक गतिविधि विस्तार गर्ने उहाँले बताउनु भयो। अधुरा सडक कालोपत्रे समयमै सम्पन्न गर्ने, गाउँ–गाउँसम्म मोटरेबल सडक विस्तार गर्ने, पुल तथा कल्भर्ट निर्माणलाई प्राथमिकता दिने र किसानको उत्पादन बजारसम्म सहज पहुँच पुर्याउने उहाँको प्रतिबद्धता छ।
“विदेश होइन – अनलाइनबाटै आम्दानी”:
डिजिटल युवा अभियान अन्तर्गत आईटी तथा डिजिटल सीप तालिम केन्द्र स्थापना गरिने शाहीले बताए। फ्रीलान्सिङ, डिजिटल मार्केटिङ र प्रोग्रामिङ तालिममार्फत युवालाई घरबाटै आम्दानी गर्ने वातावरण बनाइनेछ। स्टार्टअप र इनोभेसनमा सहयोग पुर्याई प्रविधिमै रोजगारी सिर्जना गर्ने लक्ष्य उनले राखेका छन्।
“शिक्षा र स्वास्थ्य – हाम्रो पहिलो प्राथमिकता”:
विद्यालय भवन मर्मत, डिजिटल कक्षा सञ्चालन, स्वास्थ्य चौकी स्तरवृद्धि, निःशुल्क स्वास्थ्य शिविर नियमित सञ्चालन तथा एम्बुलेन्स सेवा विस्तार गर्ने योजना सार्वजनिक गरिएको छ। शिक्षा र स्वास्थ्य सेवामा पहुँच र गुणस्तर दुवै सुधार्ने उहाँले बताउनु भएको छ।
उम्मेदवार शाहीले फागुन २१ गते हुने निर्वाचनमा सूर्य चिन्हमा मतदान गर्न मतदातासँग अपिल समेत गर्नु भएको छ। सुर्खेत–१ मा समृद्धि र रोजगारी केन्द्रित अभियानमार्फत दीर्घकालीन विकासको मार्गचित्र प्रस्तुत गरिएको उहाँको दाबी छ।
