१६ फागुन, सुर्खेत-
नेपाल शिक्षक संघ, सुर्खेतको २७औं जिल्ला प्रतिनिधिसभा आज वीरेन्द्रनगर मा सम्पन्न भएको छ। जिल्ला कार्य समिति सुर्खेतका अध्यक्ष सुरेन्द्र बहादुर रावतको अध्यक्षतामा सम्पन्न प्रतिनिधिसभामा संघको संस्थागत दृष्टिकोण, नीति तथा आगामी कार्यदिशाबारे व्यापक छलफल गरिएको थियो। सभामा अध्यक्ष रावतले संस्थागत दृष्टिकोणसहितको प्रतिवेदन प्रस्तुत गर्नुभएको थियो भने उपाध्यक्ष अमृता सापकोटाले महिला विभागको प्रतिवेदन, सचिव भुपेन्द्र बहादुर सिंहले सांगठनिक प्रतिवेदन, अर्थ सचिव नवीन कुमार महताराले आर्थिक प्रतिवेदन र संयोजक विष्णुप्रसाद चपाँईले सहकारी विभागको प्रतिवेदन पेश गर्नुभएको थियो।
विशिष्ट व्यक्तित्वहरू सम्मानित
प्रतिनिधिसभाका अवसरमा नेपाल शिक्षक महासंघ राष्ट्रिय समितिका निवर्तमान उपाध्यक्ष तथा नेपाली काँग्रेस का केन्द्रीय सदस्य तिर्थजंग शाही र महासंघकै पूर्व उपाध्यक्ष तथा नेपाली काँग्रेस सुर्खेत क्षेत्र नं. १ का सभापति झक बहादुर डाँगीलाई विशेष सम्मान गरिएको थियो।
त्यसैगरी, सुर्खेत जिल्लाअन्तर्गतका नौवटै पालिकाका स्थानीय कार्य समितिहरूलाई सफल कार्यकालका लागि सम्मान गरिएको छ। संघको संस्थागत विकासमा योगदान पुर्याउने शिक्षकहरू बालाराम अधिकारी, दुर्गा शाक्य, खगीसरा शाही, कुमारी विन्द्रा बडुवाल, हिरामणी पोखरेल, सुमित्रा खत्री र अभिभावक नन्दा पोखरेललाई समेत सम्मान गरिएको थियो। संस्थागत विकासमा निरन्तर सहयोग पुर्याएको भन्दै ज्ञानपुञ्ज शैक्षिक सहकारी संस्था लि. का सचिव धर्मराज कार्की र व्यवस्थापक **नैनसरा जि.सी.**लाई पनि कदरपत्र प्रदान गरिएको छ।
उच्चस्तरीय आतिथ्यता र समसामयिक बहस
कार्यक्रममा प्रमुख अतिथिका रूपमा तिर्थजंग शाही उपस्थित रहनुभएको थियो भने विशेष अतिथिमा नेपाल शिक्षक संघ संघीय कार्य समितिका वरिष्ठ उपाध्यक्ष इलम बहादुर शाही र झक बहादुर डाँगी रहनुभएको थियो। साथै संघीय सदस्य कृष्णप्रसाद सापकोटा, सुर्खेत क्षेत्र नं. २ का प्रतिनिधिसभा सदस्य उम्मेदवार नारायण कुमार कोइराला लगायत विभिन्न पेसागत तथा ट्रेड युनियन संस्थाका केन्द्र, प्रदेश र जिल्ला नेतृत्वको उपस्थिति रहेको थियो। वक्ताहरूले २७औं प्रतिनिधिसभाको सफलताको शुभकामना व्यक्त गर्दै संघले अघि सारेका नीति तथा कार्यक्रमहरूमाथि रचनात्मक सुझाव दिएका थिए।
प्रतिनिधिसभामा प्रस्तुत सबै प्रतिवेदनहरू सुझावसहित पारित गरिएको छ भने जिल्ला कार्य समितिका निर्णयहरू अनुमोदन गरिएको छ। उपाध्यक्ष अमृता सापकोटाले स्वागत मन्तव्य राख्नुभएको उद्घाटन सत्र सचिव भुपेन्द्र बहादुर सिंहले सञ्चालन गर्नुभएको थियो भने बन्द सत्रको सञ्चालन सहसचिव भुपेन्द्र प्रसाद सुवेदीले गर्नुभएको थियो। २७औं जिल्ला प्रतिनिधिसभा विभिन्न निर्णय तथा सम्मान कार्यक्रमसहित सफलतापूर्वक सम्पन्न भएको आयोजकले जनाएको छ।
