१६ फागुन,जाजरकोट-
सामुदायिक सरसफाइ तथा वातावरण संरक्षण अभियानलाई सुदृढ बनाउने उद्देश्यले छिमेक लघुवित्त वित्तिय संस्था लिमिटेड जाजरकोट शाखाले रिम्ना बजार व्यवस्थापन समितिलाई डस्टबिन हस्तान्तरण कार्यक्रम सम्पन्न गरेको छ।
रिम्ना बजार क्षेत्रमा बढ्दो फोहोर व्यवस्थापन चुनौतीलाई मध्यनजर गर्दै आयोजित कार्यक्रममा,संस्थाका अनुगमन अधिकृत तपेन्द्र साउँद, शाखा प्रमुख मान बहादुर राना तथा बजार व्यवस्थापन समितिका अध्यक्ष दीपक परीयार लगायत अन्य पदाधिकारीहरूको उपस्थितिमा आवश्यक संख्यामा डस्टबिन प्रदान गरिएको थियो। कार्यक्रममा बोल्दै शाखा प्रमुखरानाले वित्तीय सेवासँगै सामाजिक उत्तरदायित्वलाई संस्थाले प्राथमिकतामा राखेको उल्लेख गर्दै बजार क्षेत्र स्वच्छ राख्न सबैको सहकार्य अपरिहार्य रहेको बताउनु भयो।
बजार व्यवस्थापन समितिका अध्यक्ष परीयारले संस्थाको सहयोगप्रति आभार व्यक्त गर्दै डस्टबिनको उचित प्रयोग तथा नियमित व्यवस्थापन गरिने प्रतिबद्धता जनाए। उनले यस पहलले रिम्ना बजारलाई सफा, व्यवस्थित र आकर्षक बनाउन टेवा पुग्ने विश्वास व्यक्त गर्नुभयो। कार्यक्रममा स्थानीय व्यवसायी, सर्वसाधारण तथा सरोकारवाला निकायहरूको उल्लेख्य सहभागिता रहेको थियो। सहभागीहरूले सरसफाइ अभियानलाई निरन्तरता दिने प्रतिबद्धता व्यक्त गरेका थिए। उक्त कार्यक्रमले वित्तीय संस्थाहरूले सामाजिक उत्तरदायित्व अन्तर्गत समुदायसँग सहकार्य गर्दै स्थानीय विकासमा महत्वपूर्ण भूमिका निर्वाह गर्न सक्ने सन्देश दिएको छ।
