१४ फागुन, सुर्खेत-
आसन्न निर्वाचनलाई लक्षित गर्दै चुनाव विरोधी गतिविधि गर्न सक्ने आशंकामा सुर्खेत प्रहरीले ८ जनालाई नियन्त्रणमा लिएको छ। जिल्ला प्रहरी कार्यालय सुर्खेतका प्रवक्ता मोहनजंग बुढथापाका अनुसार वीरेन्द्रनगर लगायत जिल्लाका विभिन्न स्थानबाट उनीहरूलाई नियन्त्रणमा लिइएको हो।
प्रहरीले दिएको जानकारी अनुसार नियन्त्रणमा लिइएकामध्ये वीरेन्द्रनगर–१ बाङ्गेसिमलका ६६ वर्षीय नारायण न्यौपाने (क्रान्तिकारी कम्युनिष्ट पार्टीका जिल्ला इन्चार्ज, सि.सि.एम.), कालिकोट नरहरीनाथ गाउँपालिका–७ का ३० वर्षीय धिर दर्जी उर्फ डेबिट परियार (वैज्ञानिक समाजवादी कम्युनिष्ट पार्टीका जिल्ला सचिव), सान्नी त्रिवेणी गाउँपालिका–६ का ४१ वर्षीय कर्ण बहादुर बि.सी. (क्रान्तिकारी कम्युनिष्ट पार्टीका ब्युरो सदस्य, सि.सि.एम.) र कैलाली धनगढी उपमहानगरपालिका–१२ का ३८ वर्षीय श्याम कुवँर (वैज्ञानिक समाजवादी कम्युनिष्ट पार्टीका जिल्ला सचिव, सि.सि.एम.) रहेका छन्।
त्यसैगरी वीरेन्द्रनगर–११ का ४५ वर्षीय राजकुमार पौडेल ‘राजु’ (नेकपा बहुमतका जिल्ला सचिव), भेरीगंगा नगरपालिका–१२ झुल्नेका ५४ वर्षीय रन्त बहादुर वली (नेकपा क्रान्तिकारीका सुर्खेत जिल्ला कमिटी सचिव), भेरीगंगा–९ ठुलोजात्रीका ६६ वर्षीय पुर्ण तिरुवा (नेकपा बहुमतका वडा कमिटी सदस्य) र रुकुम पश्चिम चौरजारी नगरपालिका–८ का ३८ वर्षीय मान बहादुर मल्ल (पार्टी आबद्धता नखुलेको) पनि नियन्त्रणमा परेका छन्।
प्रहरी प्रवक्ता मोहनजंग बुढथापाले उनीहरूमाथि शान्ति सुरक्षा विथोल्ने कसुरमा मुद्दा दर्ता गरिने जानकारी दिनुभयो। जिल्लामा निर्वाचनलाई स्वच्छ, निष्पक्ष र शान्तिपूर्ण वातावरणमा सम्पन्न गराउन सुरक्षा सतर्कता बढाइएको प्रहरीले जनाएको छ। सम्भावित अवाञ्छित गतिविधि रोक्न संवेदनशील क्षेत्रमा निगरानी कडा पारिएको र कानुन विपरीत गतिविधि गर्ने जो–कोहीलाई कारबाही गरिने चेतावनी समेत प्रहरीले दिएको छ।
