२२ माघ, सुर्खेत-
गुर्भाकोट नगरपालिकामा फागुन २३ देखि संचालन हुने मेयर कप प्रतियोगिताको उद्घाटनको दिन डोरितान खेल हुने भएको छ। मेयर कप प्रतियोगिताको उद्घाटनको दिन गुर्भाकोट नगरपालिकाका जनप्रतिनिधि र कर्मचारी विच डोरितान खेल हुने शिक्षा शाखा प्रमुख पदम बिकले द्वारा हस्ताक्षरित सुचनामा उल्लेख गरिएको छ।
गुर्भाकोट नगरपालिका नगर खेलकुद विकास समितिको २०८० माघ १४ गते बसेको बैठकले फागुन २३ देखि मेयर कप प्रतियोगिता संचालन गर्ने निर्णय गरेको थियो। ११ बजे गोकलपुर मिनी रङ्गशालामा मेयर कप प्रतियोगिताको उद्घाटन हुने छ भने मेयर कप प्रतियोगितामा सहभागिताको लागी फागुन १५ गते सम्म गुर्भाकोट नगरपालिका शिक्षा युवा तथा खेलकुद शाखामा समुह दर्ता गर्न सकिनेछ। फागुन २३ गते मेयर कप प्रतियोगिताको उद्घाटन भए सँगै २३, २४ ,२५ र २६ गते खेल संचालन हुने छन्।
महिला भलिवल,पुरुष भलिवल,पुरुष फुटवल र पुरुष ब्याडमिन्टन विधाका खेलहरु संचालन हुनेछन। गुर्भाकोट नगरपालिका वडा नम्बर ७ स्थित मिनी रङ्गशालामा फुटवल खेल संचालन हुनेछ भने गुर्भाकोट नगरपालिका वडा नम्बर १२ मा रहेको देउती बज्यै मन्दिर परिसरमा भलिवल खेल संचालन हुनेछ।
यस्तै गुर्भाकोट नगरपालिका वडा नम्बर ८ स्थित वडा कार्यालय परिसरमा ब्याडमिन्टन खेल संचालन हुनेछ।उद्घाटन कार्यक्रममा खेलाडीहरु आ-आफ्नो वडाको ब्यानर,रास्ट्रीय झण्डा र खेल पोशाक सहित उपस्थित भै मार्चपासमा सहभाई हुनुपर्नेछ।
