८ मंसिर ,रुकुमपश्चिम
रुकुमपश्चिममा बसबाट झर्दै गर्दा लडेर एक जनाको मृत्यु भएको छ भने दुई जना घाइते भएका छन्। रुकुमपश्चिको आठबिसकोट नगरपालिका–११ चिसापानीस्थित राडि बजारदेखि नेपालगन्ज जाँदै गरेको बसबाट ओर्लिदैँ गर्दा लडेर तीन जना घाइते भएका थिए। शुक्रबार साँझ साढे ६ बजेको समयमा ना ३ ख ५२०७ नम्बरको बसबाट यात्रुलाई झार्दै गर्दा लडेर तीन जना यात्रु घाइते भएको जिल्ला प्रहरी कार्यालय रुकुमपश्चिमले बताएको छ । घाइते हुनेहरूमा रुकुमपश्चिमको आठबिसकोट नगरपालिका–११ बस्ने अन्दाजी ३८ वर्षीया गणेश दमाई, वडा नम्बर १४ बस्ने १९ वर्षीया भावना चन्द र वडा नम्बर १४ बस्ने १९ वर्षीया राजेन्द्र पोखरेल रहेका छन्।
जिल्ला प्रहरी कार्यालय रुकुमपश्चिमा प्रहरी निरीक्षक तथा सूचना अधिकारी विष्णु श्रेष्ठका अनुसार घाइतेमध्ये गणेश दमाईको आठबिसकोट नगर अस्पताल राडीमा उपचारको क्रममा शुक्रबार साँझ ८ बजेर १० मिनेटको समयमा मृत्यु भएको हो। उहाँका अनुसार ‘बसका कर्मचारीहरुले बसबाट झार्दाखेरि लडेर तीन जना यात्रु घाइते भएछन्। यात्रुलाई बसबाट झार्दाखेरि तीन जनालाई घाइते बनाएर बस करिब ३ किलोमिटर अगाडी आठबिसकोट नगरपालिका–११ रिठ्ठा पुगेको रहेछ। त्यहाँ स्थानीयहरुले बसलाई रोकेर राखेका थिए।’ अहिले बसलाई प्रहरीले नियन्त्रणमा लिएको छ। चालक र सह–चालक भने फरार भएका छन् ।
