रुकुम पश्चिममा भएको जिप दुर्घटनामा परी दुई जनाको मृत्यु भएको छ । दुर्घटनामा परी गम्भीर घाइते भएका चौरजहारी नगरपालिका १३ का मस्तबहादुर ओली र सानीभेरी गाउँपालिका २ का २ वर्षीय बालक प्रतीक बुढामगरको उपचारका क्रममा मृत्यु भएको प्रहरीले जानकारी दिएको छ । जिप दुर्घटनामा गम्भीर घाइते भएका ६ जनालाई थप उपचारका लागि जिल्ला बाहिर रिफर गरिएको छ । जिल्ला प्रहरी कार्यालय रुकुम पश्चिमका प्रहरी नायब उपरिक्षक नमराज भट्टराईका अनुसार दुर्घटनामा घाइते चौरजहारी नगरपालिका वडा नम्वर १४ की ४ वर्षीया डिला बिष्ट र सानीभेरी गाउँपालिका वडा नम्वर २ निवासी सपना बुढाको नेपालगञ्जमा उपचार भइरहेको छ ।
यस्तै गम्भीर घाइते भएका अन्य ४ जनाको सुर्खेतमा उपचार भइरहेको प्रहरीको भनाइ छ । चौरजहारी नगरपालिकावडा नम्बर ११ का रण बहादुर ओली, वडा नम्बर १४ का प्रेम परियार, कविता परियार र वड नम्बर १० का प्रविर पुनको सुर्खेतमा उपचार भइरहेको छ । सोमबार बिहान चौरजहारी नगरपालिका ८ को गोईरीज्युलामा लु १ ज २२९७ नम्बरको जिप अनियन्त्रित भएर दुर्घटना भएको थियो । अन्य घाइते सबैको चौरजहारी मिसन अस्पतालमा उपचार भइरहेको छ । क्षमता भन्दा बढी यात्रु बोकेको उक्त जिप अनियन्त्रित हुँदा करिब तीन सय मिटर तल खसेको बताइएको छ । चौरजहारीबाट जिल्ला सदरमुकाम मुसीकोटतर्फ जाँदै गरेको जिप दुर्घटना भएको हो ।
