२५ माघ,सुर्खेत-
आगामी प्रतिनिधि सभा सदस्य निर्वाचन २०८२ लाई सुरक्षित, निष्पक्ष र भयरहित रूपमा सम्पन्न गराउने उद्देश्यले सुर्खेत जिल्लामा रहेका मतदानस्थलहरूको अनुगमन तथा निरीक्षण गरिएको छ। सुर्खेत जिल्लामा रहेका दुईवटै निर्वाचन क्षेत्र अन्तर्गतका विभिन्न मतदानस्थलहरूको प्रमुख जिल्ला अधिकारीको नेतृत्वमा जिल्ला सुरक्षा समितिका पदाधिकारीहरू, दुवै निर्वाचन क्षेत्रका निर्वाचन अधिकृतहरू तथा सम्बन्धित निकायका प्रतिनिधिहरू सम्मिलित संयुक्त टोलीद्वारा स्थलगत निरीक्षण गरिएको हो।
अनुगमनका क्रममा मतदानस्थलसम्म पुग्ने सडकको अवस्था, मतदानस्थलको सुरक्षा व्यवस्था तथा आवश्यक भौतिक पूर्वाधारहरूको अवलोकन गरिएको थियो। साथै स्थानीय भद्रभलादमी, निर्वाचित स्थानीय जनप्रतिनिधि, राजनीतिक दलका प्रतिनिधिहरू, विद्यालयका प्रधानाध्यापक तथा पदाधिकारीहरू लगायत सरोकारवालाहरूसँग अन्तरक्रिया गरी आसन्न निर्वाचनलाई सुरक्षित, निष्पक्ष र भयरहित बनाउन सबै पक्षको साझा भूमिकाबारे छलफल गरिएको छ।
यसै क्रममा स्थानीय तहमा खटिएका सम्पूर्ण सुरक्षा निकायका सुरक्षाकर्मीहरूलाई सुरक्षा संवेदनशीलताको विश्लेषण गरी मतदानस्थलमा शान्ति–सुरक्षा कायम राख्न, निर्वाचन आचारसंहिता पूर्ण रूपमा पालना गराउन तथा मतदाता र उम्मेदवारहरूको सुरक्षालाई उच्च प्राथमिकतामा राखी जिम्मेवारीपूर्वक कार्य गर्न निर्देशन दिइएको छ। त्यस्तै, निर्वाचनसँग सम्बन्धित कुनै पनि घटना, कसुर वा आचारसंहिता उल्लङ्घन भएको खण्डमा नजिकको प्रहरी कार्यालय, निर्वाचन अधिकृत वा सम्बन्धित सुरक्षा निकायमा तत्काल जानकारी गरिदिन सर्वसाधारण सबैमा हार्दिक अनुरोध गरिएको छ।
