१ फागुन, सुर्खेत-
भेरीगंगा नगरपालिकाको आयोजनामा जलवायु परिवर्तन तथा विपद् जोखिम न्युनिकरण विषयक एकदिने कार्यशाला गोष्ठी सफलतापूर्वक सम्पन्न भएको छ। नगर प्रमुख यज्ञ प्रसाद ढकाल ज्यूको अध्यक्षतामा सम्पन्न गोष्ठीमा जलवायु परिवर्तन र विपद्जन्य जोखिमका प्रभावलाई कसरी रोकथाम तथा न्युनिकरण गर्ने भन्ने विषयमा गहन छलफल गरिएको थियो।
कार्यशालामा प्राकृतिक विपद्बाट उत्पन्न हुने जोखिमको पूर्वतयारी, आपत्कालीन प्रतिकार्य क्षमता अभिवृद्धि, तथा परिवर्तित जलवायु अवस्थाअनुसार जीवनशैलीलाई कसरी अनुकूलन गर्ने भन्ने रणनीतिक र व्यावहारिक पक्षमा सहभागीहरूले सुझाव प्रस्तुत गरेका थिए। साथै स्थानीय तहबाट दीर्घकालीन योजना निर्माण, समुदायको सक्रिय सहभागिता, र समन्वयात्मक कार्यप्रणालीलाई सुदृढ बनाउने विषयलाई प्राथमिकतामा राखिएको थियो। कार्यक्रमले जलवायु परिवर्तनका चुनौतीसँग सामना गर्न नगरस्तरमा साझा दृष्टिकोण विकास गर्ने, जोखिम न्युनिकरणका उपायलाई संस्थागत गर्ने, र दिगो विकासतर्फ अघि बढ्ने दिशामा महत्वपूर्ण योगदान पुर्याउने अपेक्षा गरिएको छ।
