२४ माघ, सुर्खेत
गुर्भाकोट नगरपालिकामा अपाङ्गता भएका व्यक्तिहरूको प्रत्यक्ष सहभागितामा खण्डीकृत तथ्याङ्क संकलन तथा अपाङ्गता परिचयपत्र वितरणसम्बन्धी शिविर कार्यक्रम सम्पन्न भएको छ। गुर्भाकोट नगरपालिका महिला, बालबालिका तथा समाजकल्याण शाखाको आयोजनामा तथा आईएनएफ नेपाल सुर्खेतको समन्वयमा सञ्चालन गरिएको उक्त कार्यक्रम माघ १९ गतेदेखि सुरु भई आज माघ २४ गते सम्पन्न भएको हो।
कार्यक्रमअन्तर्गत नगरपालिकाका विभिन्न वडाहरूमा शिविर सञ्चालन गरिएको थियो। माघ १९ गते वडा नम्बर ३ मा सञ्चालन भएको शिविरमा ९ जनाले सेवा लिएका थिए, जसमा ४ जनाले अपाङ्गता परिचयपत्र प्राप्त गरेका छन्। तीमध्ये ख वर्गका २ जना र ग वर्गका २ जना रहेका छन्। यस्तै, माघ २१ गते वडा नम्बर १३ को गुमीमा सञ्चालन गरिएको शिविरमा ५३ जनाले सेवा लिएका थिए। सो क्रममा १३ जनाले अपाङ्गता परिचयपत्र प्राप्त गरेका थिए, जसमा क वर्गका ४ जना, ख वर्गका ६ जना, ग वर्गका २ जना र घ वर्गका १ जना रहेका छन्।
माघ २२ गते सिटिहल (खैरेनी) मा सञ्चालन भएको शिविरमा ४७ जनाले सेवा लिएका थिए। तीमध्ये २४ जनाले परिचयपत्र प्राप्त गरेका छन्। वर्गगत विवरणअनुसार क वर्गका ५ जना, ख वर्गका १० जना, ग वर्गका ५ जना र घ वर्गका ४ जना रहेका छन्। यसैगरी, माघ २३ गते वडा नम्बर १० को भेडावारीमा सञ्चालन भएको शिविरमा ३३ जनाले सेवा लिएका थिए। सो क्रममा १७ जनाले परिचयपत्र प्राप्त गरेका छन्, जसमा क वर्गका २ जना, ख वर्गका ८ जना र ग वर्गका ७ जना रहेका छन्।
कार्यक्रमको अन्तिम दिन माघ २४ गते वडा नम्बर ४ मा सञ्चालन गरिएको शिविरमा ४५ जनाले सेवा लिएका छन्। तीमध्ये २३ जनाले अपाङ्गता परिचयपत्र प्राप्त गरेका छन्। वर्गगत रूपमा क वर्गका ११ जना, ख वर्गका ४ जना, ग वर्गका ६ जना र घ वर्गका २ जना रहेको महिला बालबालिका तथा समाजकल्याण शाखा प्रमुख बिमला बिकले जानाल्कारी दिनुभयो। यसरि हेर्दा समग्रमा सेवा लिनेको संख्या एक सय ८७ रहेको छ।
नगरपालिकाले अपाङ्गता भएका व्यक्तिहरूको यथार्थ विवरण संकलन गरी लक्षित सेवा, सुविधा र योजनालाई प्रभावकारी बनाउने उद्देश्यले यस्तो कार्यक्रम सञ्चालन गरिएको जनाएको छ। शिविरमा महिला बालबालिका शाखा प्रमुख बिमला बिक तथा शाखामा कार्यरत कर्मचारी ,मेहेलकुना अस्पतालमा कार्यरत MDGP डाक्टर सन्दिप घर्ती,डाक्टर राजकुमार भुजेल तथा खगेन्द्र भण्डारी,स्वास्थाकर्मीहरु लगाएत आईएनएफ सुर्खेतका कर्मचारी,जनप्रतिनिधि,शिक्षा शाखा प्रमुख बलबीर बिक लगाएतको उपस्थिति रहेको थियो।
