माघ २४, सुर्खेत
आसन्न प्रतिनिधिसभा निर्वाचन–२०८२ लाई लक्षित गर्दै निर्वाचन आचारसंहिता विपरीत गतिविधि गरेको आरोपमा सुर्खेतबाट ‘THE DANGEROUS SKULL’ नामक युवा समूहका २५ जना युवालाई प्रहरीले नियन्त्रणमा लिएको छ।
जिल्ला प्रहरी कार्यालय सुर्खेतका अनुसार मिति २०८२।१०।२४ गते दिउँसो करिब २ः५० बजेको समयमा वीरेन्द्रनगर नगरपालिका–११ धुलियाबिट नजिक तिनकुने चोक हुँदै धुलियाबिटतर्फ जाँदै गरेको अवस्थामा उक्त समूहले स्थानीय प्रशासनको कुनै पनि अनुमति नलिई कालो–सेतो रङको झण्डा बोकी मोटरसाइकल र्याली निकालेको पाइएको हो। वीरेन्द्रनगर नगरपालिका–३ तातापानीमा आधारित सो समूहका युवाहरूले मोटरसाइकल तथा स्कुटी प्रयोग गरी हो–हल्ला गर्दै सार्वजनिक शान्ति सुरक्षामा खलल पुर्याएको, साथै निर्वाचन आचारसंहिता र प्रचलित निर्वाचन कानुनले निषेध गरेका गतिविधि गरेको प्रारम्भिक अनुसन्धानबाट खुलेको प्रहरीले जनाएको छ।
घटनाको जानकारी पाएलगत्तै जिल्ला प्रहरी कार्यालय सुर्खेत र नगर प्रहरी कार्यालयबाट खटिएको करिब ३० जनाको संयुक्त प्रहरी टोलीले ८ वटा मोटरसाइकल र ४ वटा स्कुटी सहित २५ जनालाई नियन्त्रणमा लिएको हो। पक्राउ परेका सबैलाई आवश्यक अनुसन्धानका लागि जिल्ला प्रहरी कार्यालय सुर्खेतमा राखिएको छ। प्रहरीले निर्वाचनको संवेदनशील समयमा कुनै पनि किसिमका अवाञ्छित गतिविधि नगर्न सबैलाई आग्रह गर्दै कानून विपरीत कार्य गर्ने जो–कोहीलाई कडाइका साथ कारबाही गरिने चेतावनी दिएको छ।
