१८ माघ, सुर्खेत
लोकसेवा आयोग सुर्खेत कार्यालयद्वारा सञ्चालित प्रहरी जवान (जनपद) पदको लिखित परीक्षामा नक्कली परीक्षार्थी बनाएर परीक्षा दिने कार्यमा संलग्न १२ जनालाई प्रहरीले पक्राउ गरेको छ।
प्रहरीका अनुसार मिति २०८२/१०/१७ गते सञ्चालन भएको परीक्षामा केही व्यक्तिहरूले आर्थिक लाभको लोभमा अर्काको नाममा परीक्षा दिन नक्कली परीक्षार्थी खडा गरेको, नागरिकता र प्रवेशपत्रमा फोटो तथा हस्ताक्षर परिवर्तन गरी किर्ते कागजात तयार पारेको अवस्थामा फेला परेका थिए। शंकास्पद गतिविधि देखिएपछि नियन्त्रणमा लिइएका उनीहरूलाई अनुसन्धानका लागि कार्यालयमा ल्याइएको जनाइएको छ। उक्त घटनामा लिखत किर्ते, किर्ते कागजात प्रयोग तथा आपराधिक लाभ सम्बन्धी कसूरमा अनुसन्धान अघि बढाइएको प्रहरीले जनाएको छ।
पक्राउ परेकाहरू (प्रहरीका अनुसार):
-केसव थापा, १९ वर्ष, छेडागाड न.पा.–११, जाजरकोट (नक्कली परीक्षार्थी)
-रमेश नेपाली, १८ वर्ष, दुल्लु न.पा.–१, दैलेख (नक्कली)
-बिर बहादुर ठाडा, २४ वर्ष, गुर्भाकोट न.पा.–१३, सुर्खेत (नक्कली)
-बिपेश सिंह, १९ वर्ष, कुसे गा.पा.–२, जाजरकोट (परीक्षा दिन लगाइएको)
-ललित रावल, १८ वर्ष, जुनेदाचाँदे गा.पा.–१, जाजरकोट (परीक्षा दिन लगाउने समूह)
-सूर्य किरण शाही, १८ वर्ष, कुसे गा.पा.–२, जाजरकोट (परीक्षा दिन लगाउने समूह)
-निरज शाही, २१ वर्ष, कुसे गा.पा.–२, जाजरकोट (परीक्षा दिन लगाइएको)
-चन्द्र शाह, १९ वर्ष, छेडागाड न.पा.–१०, जाजरकोट (नक्कली)
-नवराज विक, २३ वर्ष, कुसे गा.पा.–२, जाजरकोट (नक्कली)
-रामु कार्की, २४ वर्ष, बैजनाथ गा.पा.–२, बाँके (नक्कली)
-मोतिलाल थारु, २५ वर्ष, बैजनाथ गा.पा.–१, बाँके (नक्कली)
-पूर्ण बहादुर सिंह, २६ वर्ष, स्थायी घर कुसे गा.पा.–२ जाजरकोट, हाल वीरेन्द्रनगर–९, सुर्खेत (मतियार/सहयोगी)
प्रहरीले परीक्षा प्रणालीमा ठगी गर्ने समूह संगठित रूपमा सक्रिय रहेको आशंका गर्दै थप अनुसन्धान भइरहेको जनाएको छ। यस प्रकारका कार्यले राज्य सेवामा निष्पक्ष प्रतिस्पर्धा र विश्वासमाथि गम्भीर असर पार्ने भएकाले कडा कानुनी कारबाही गरिने चेतावनी समेत दिइएको छ। घटनाबारे थप विवरण अनुसन्धानपछि सार्वजनिक गरिने प्रहरीले बताएको छ।
