२४ जेठ, सुर्खेत-
सुर्खेत–छिन्चु सडकखण्ड अन्तर्गत भेरीगंगा नगरपालिका–१२ पाडुलेमा आइतबार साँझ ईभी गाडी दुर्घटना हुँदा पाँच जना घाइते भएका छन्। प्रहरीका अनुसार जेठ २४ गते साँझ करिब ६ बजे सुर्खेतबाट छिन्चुतर्फ जाँदै गरेको भे.१ ज.१७८६ नम्बरको ईभी गाडी एक्कासी अनियन्त्रित भई सडकबाट करिब २०–२५ मिटर तल खस्न जाँदा दुर्घटनामा परेको हो। गाडीमा सवार पाँचै जना घाइते भएका छन्।
दुर्घटनामा चालक बाँकेको कोहलपुर नगरपालिका–१३ निवासी २३ वर्षीय विवेक वलीको दाहिने खुट्टामा चोट लागेको छ भने उनको अवस्था मध्यम रहेको जनाइएको छ। सहचालक सोही स्थानका २० वर्षीय खगेन्द्र खत्रीको छातीमा चोट लागेको छ। त्यसैगरी कोहलपुर नगरपालिका–१० निवासी ५४ वर्षीय ज्ञानबहादुर शाहीको टाउको, ढाड र हातमा चोट लागेको छ। बैजनाथ गाउँपालिका–२ निवासी ५८ वर्षीय प्रेमबहादुर चन्दको हात र टाउकोमा चोट लागेको छ भने दैलेखको महाबु गाउँपालिका–३ निवासी ४४ वर्षीय विष्णु बुढाको शरीरका विभिन्न भागमा गम्भीर चोट लागेको प्रहरीले जनाएको छ।
घाइते सबैलाई थप उपचारका लागि नेपालगञ्ज मेडिकल कलेज पठाइएको छ। विष्णु बुढाको अवस्था गम्भीर रहेको बताइएको छ। दुर्घटनाको जानकारी प्राप्त हुनासाथ इलाका प्रहरी कार्यालय छिन्चुबाट प्रहरी निरीक्षक प्रकाश केसीको कमाण्डमा ट्राफिक प्रहरीसहित सात जनाको टोली घटनास्थलमा खटिएको थियो। दुर्घटनाग्रस्त गाडी घटनास्थलमै रहेको र सडक यातायात सञ्चालनमा कुनै अवरोध नभएको प्रहरीले जनाएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।
