२६ जेठ, सुर्खेत-
गुर्भाकोट नगरपालिकाको शिक्षा, युवा तथा खेलकुद शाखाको आयोजनामा स्थानीय कृषि उपजमा आधारित विद्यालय दिवा खाजा कार्यक्रम (होम ग्रोन स्कुल फिडिङ प्रोग्राम) सम्बन्धी समीक्षात्मक बैठक सम्पन्न भएको छ। कार्यक्रममा नगरभित्र रहेका ७२ वटा सामुदायिक विद्यालयका प्रधानाध्यापकहरूको सहभागिता रहेको थियो। नगर प्रमुख हस्त पुनको अध्यक्षतामा सम्पन्न कार्यक्रममा World Food Programme (WFP) को सहयोग तथा समन्वयमा विद्यालय दिवा खाजा कार्यक्रमको वर्तमान अवस्था, चुनौती र आगामी कार्यदिशाबारे विस्तृत छलफल गरिएको थियो। कार्यक्रममा प्रशिक्षक रुद्र सुनारले स्थानीय उत्पादनमा आधारित दिवा खाजा कार्यक्रमको अवधारणा, पोषण व्यवस्थापन तथा कार्यान्वयनका विविध पक्षबारे सहजीकरण गरेका थिए। शिक्षा, युवा तथा खेलकुद शाखा प्रमुख बलवीर विकले कार्यक्रमको उद्देश्यबारे जानकारी गराउँदै विद्यालयमा उपलब्ध गराइने दिवा खाजालाई थप पोषणयुक्त, गुणस्तरीय तथा स्थानीय कृषि उत्पादनसँग जोड्दै लैजानुपर्ने आवश्यकता औंल्याए। कार्यक्रममा शाखाका कर्मचारी खगेन्द्र माझी लगायतको पनि उपस्थिति रहेको थियो।
बैठकमा सहभागी प्रधानाध्यापकहरूले दिवा खाजा कार्यक्रमलाई प्रभावकारी बनाउन स्थानीय किसानसँग विद्यालयको प्रत्यक्ष समन्वय बढाउनुपर्ने, विद्यालय परिसरमा करेसाबारी तथा पोषण बगैंचा विस्तार गर्नुपर्ने, खाद्य सामग्रीको गुणस्तर सुनिश्चित गर्नुपर्ने तथा विद्यार्थीको पोषण अवस्थालाई नियमित अनुगमन गर्नुपर्ने सुझाव दिएका थिए। उनीहरूले स्थानीय उत्पादनको प्रयोगले किसानको आम्दानी वृद्धि हुनुका साथै विद्यालयस्तरमै पोषण सुधारमा टेवा पुग्ने धारणा व्यक्त गरेका थिए।
कार्यक्रममा नगर प्रमुख हस्त पुनले विद्यालय दिवा खाजा कार्यक्रम केवल खाना वितरणमा सीमित नभई विद्यार्थीको स्वास्थ्य, सिकाइ उपलब्धि र स्थानीय अर्थतन्त्रसँग प्रत्यक्ष जोडिएको महत्वपूर्ण अभियान भएको बताउनु भयो। उहाँले स्थानीय किसानले उत्पादन गरेका अन्न, तरकारी तथा अन्य खाद्य सामग्रीलाई विद्यालयको दिवा खाजामा समावेश गर्न सके विद्यार्थीले ताजा र पोषणयुक्त खाना पाउने तथा स्थानीय उत्पादनले समेत बजार सुनिश्चितता पाउने उल्लेख गर्नुभयो । नगर प्रमुख पुनले विद्यालय, अभिभावक, किसान तथा स्थानीय सरकारबीचको सहकार्यलाई थप मजबुत बनाउँदै दिवा खाजा कार्यक्रमलाई नमूना कार्यक्रमका रूपमा विकास गरिने प्रतिबद्धता व्यक्त गर्दै प्राप्त सुझावहरूलाई आगामी योजना तथा नीतिमा समेट्दै कार्यक्रमलाई अझ प्रभावकारी र दिगो बनाइने बताउनु भयो।
बैठकमा सहभागीहरूले पोषणयुक्त खाना, स्थानीय उत्पादनको प्रवर्द्धन तथा विद्यार्थीको स्वास्थ्य सुधारलाई केन्द्रमा राखेर दिवा खाजा कार्यक्रमलाई आगामी दिनमा थप व्यवस्थित र परिणाममुखी ढंगले अघि बढाउने प्रतिबद्धता व्यक्त गरेका थिए।
