२३ जेठ, सुर्खेत-
गुर्भाकोट नगरपालिका वडा नं. ७ गोकलपुरस्थित मिनिरङ्गशालामा फुटबल दर्शकका लागि थप प्याराफिट निर्माण कार्य सुरु गरिएको छ। खेल पूर्वाधार विस्तार तथा दर्शकको सुविधालाई ध्यानमा राख्दै निर्माण कार्य अगाडि बढाइएको हो। कर्णाली प्रदेश सरकारको २५ लाख रुपैयाँ आर्थिक सहयोगमा निर्माण हुन लागेको उक्त प्याराफिटले मिनिरङ्गशालाको क्षमता वृद्धि गर्नुका साथै खेल हेर्न आउने दर्शकलाई सहज र सुरक्षित वातावरण प्रदान गर्ने अपेक्षा गरिएको छ। यस निर्माण कार्यका लागि गुर्भाकोट नगरपालिकाका नगर प्रमुख हस्त पुनको समन्वय तथा कर्णाली प्रदेश खेलकुद विकास परिषद्का सदस्य सचिव रबिन चन्द ठकुरीको विशेष पहल रहेको जनाइएको छ।
स्थानीय खेलकुद गतिविधिलाई थप व्यवस्थित र प्रभावकारी बनाउन खेल पूर्वाधारको विकास आवश्यक रहेको भन्दै सरोकारवालाहरूले यस कार्यको स्वागत गरेका छन्। प्याराफिट निर्माण सम्पन्न भएपछि गोकलपुर मिनिरङ्गशालामा आयोजना हुने विभिन्न फुटबल प्रतियोगिता तथा अन्य खेलकुद कार्यक्रमहरू अझ व्यवस्थित रूपमा सञ्चालन गर्न सहज हुने विश्वास गरिएको छ। स्थानीय खेलप्रेमी तथा युवाहरूले खेल क्षेत्रको विकासका लागि प्रदेश सरकार, नगरपालिकाका जनप्रतिनिधि तथा सम्बन्धित निकायप्रति धन्यवाद व्यक्त गर्दै यस्ता पूर्वाधार निर्माणले खेल प्रतिभाको विकासमा महत्वपूर्ण योगदान पुग्ने बताएका छन्।
