२२ जेठ, सल्यान-
कालिमाटी गाउँपालिकाले दलित उत्थान कार्यक्रम अन्तर्गत आर्थिक वर्ष २०८२/८३ को चालु बजेटबाट पालिकाभित्रका दलित एकल महिलाहरूलाई बोका–पाठी वितरण गरेको छ। गाउँपालिकाका अनुसार ७ वटै वडाका ६० वर्षमुनिका ७३ जना दलित एकल महिलालाई एक–एक जोडी बोका र पाठी प्रदान गरिएको हो। लक्षित वर्गको आर्थिक अवस्था सुधार गर्ने तथा आयआर्जनका अवसर सिर्जना गर्ने उद्देश्यका साथ कार्यक्रम सञ्चालन गरिएको गाउँपालिकाले जनाएको छ।
पशुपालनमार्फत दलित एकल महिलाहरूलाई आत्मनिर्भर बन्न प्रेरित गर्ने र उनीहरूको जीवनस्तर उकास्ने लक्ष्यका साथ कार्यक्रम कार्यान्वयन गरिएको हो। बोका–पाठी पालनबाट प्राप्त आम्दानीले लाभग्राही महिलाहरूको आर्थिक सशक्तीकरणमा महत्वपूर्ण योगदान पुग्ने अपेक्षा गरिएको गाउँपालिकाको भनाइ छ।
कार्यक्रमबाट लाभान्वित महिलाहरूले गाउँपालिकाले उपलब्ध गराएको सहयोगले दैनिक जीविकोपार्जनमा सहजता ल्याउने विश्वास व्यक्त गरेका छन्। साथै, पशुपालन व्यवसायलाई विस्तार गर्दै आयआर्जन वृद्धि गर्ने प्रतिबद्धता समेत जनाएका छन्। गाउँपालिकाले दलित समुदाय, एकल महिला तथा विपन्न वर्गको आर्थिक, सामाजिक र शैक्षिक उत्थानका लागि आगामी दिनमा पनि यस्ता लक्षित कार्यक्रमलाई निरन्तरता दिँदै जाने जनाएको छ। स्थानीय तहको यस पहलले स्वरोजगार प्रवर्द्धनसँगै दलित समुदायको आर्थिक सशक्तीकरणमा सकारात्मक प्रभाव पार्ने अपेक्षा गरिएको छ।
