१५ माघ-सुर्खेत-
सुर्खेत क्षेत्र नम्बर १ बाट राष्ट्रिय प्रजातन्त्र पार्टी (राप्रपा) का प्रतिनिधि सभा सदस्य पदका उमेद्वार रविकिरण हमालले चुनावी अभियानका क्रममा देखिएका आधारभूत समस्या समाधानको पहल गर्न नेपाल टेलिकमको ध्यानाकर्षण गराउनु भएको छ। घरदैलो तथा जनभेटघाट कार्यक्रममा व्यस्त रहँदै आएका हमालले सुर्खेत क्षेत्र नं. १ अन्तर्गत विभिन्न स्थानमा टेलिकमका टावर पटक–पटक अवरुद्ध हुने, लामो समयसम्म नेटवर्क नआउने र आपतकालीन अवस्थामा समेत सञ्चार सेवा प्रभावित हुने गम्भीर समस्या आफूले प्रत्यक्ष भोगेको र स्थानीयवासीबाट निरन्तर गुनासो आएको उल्लेख गर्नु भएको छ।
हमालले नेपाल टेलिकम सुर्खेत कार्यालयलाई लिखित रूपमा ध्यानाकर्षण गराउँदै सोलार ऊर्जाबाट सञ्चालन हुँदै आएका टावरहरूलाई तत्काल राष्ट्रिय विद्युत् प्रसारण लाइनसँग जोड्न, आवश्यक स्थानमा ब्याकअप पावरको व्यवस्था गर्न र चौबीसै घण्टा स्थिर तथा भरपर्दो नेटवर्क सेवा सुनिश्चित गर्न आग्रह गर्नु भएको हो। उहाँका अनुसार कमजोर सञ्चार सेवाका कारण शिक्षा, स्वास्थ्य, व्यापार–व्यवसाय र आपतकालीन सूचनाको आदान–प्रदानमा प्रत्यक्ष असर परिरहेको छ, जसले ग्रामीण भेगका नागरिकलाई अझ बढी मारमा पारेको छ।
जेन्जि पुस्ताका प्रतिनिधिका रूपमा चिनिएका हमालले आधुनिक समाजमा सञ्चार सेवा आधारभूत आवश्यकता भएको उल्लेख गर्दै यस विषयमा ढिलाइ नगरी तत्काल प्राविधिक सुधार र कार्ययोजना कार्यान्वयन गर्नुपर्ने बताउनु भएको छ। घरदैलो अभियानमार्फत जनतासँग नजिकिँदै आएका हमालले चुनावी भाषण मात्र नभई व्यावहारिक समस्या उठाएर समाधानको पहल गर्नु नै जिम्मेवार नेतृत्वको पहिचान भएको धारणा व्यक्त गर्नु भएको छ।
