१२ माघ,सल्यान-
कालिमाटी गाउँपालिका सल्यान लगाएत देशैभर पुराना दल बाट विकासको नाममा केहि भएन /गरिएन भन्ने भनाईको यति बेला खण्डन भईरहेका छन्। यहि सन्दर्भमा कालिमाटी गाउँपालिका वडा नं. ६ मा पनि “पुराना दलबाट केही पनि विकास भएन” भन्ने धारणा फैलिएको भन्दै वडाध्यक्ष टेकराज पुलामीले वास्तविकता अध्ययन गरेर मात्र टिप्पणी गर्न आग्रह गर्नु भएको छ। उहाँले सामाजिक संजालमा विकासका निर्माणका कामहरु लेख्दै २०६५ साल अघिको अवस्था र अहिलेको अवस्थाबीच तुलना गर्दा वडामा पूर्वाधार, सेवा पहुँच र जनजीवनमा उल्लेखनीय परिवर्तन भएको उल्लेख गर्नु भएको छ।
वडाध्यक्ष पुलामीका अनुसार विगतमा सडक सञ्जाल अत्यन्तै कमजोर हुँदा नेपालगन्ज, मेहेलकुना, जहरे, बोटेचौर हुँदै सदरमुकाम धाउनुपर्ने बाध्यता थियो। अहिले टोलटोलमा कच्ची सडक विस्तार भई यातायात पहुँच सहज बन्दै गएको उहाँले बताउनु भयो। “सबै ठाउँमा पक्की सडक पुगिसकेको छैन, तर आवतजावतमा पहिले जस्तो कठिन अवस्था अब छैन,” उहाँले भन्नुभयो। उहाँका अनुसार स्वास्थ्य सेवामा पनि सुधार आएको छ। वडाबासीलाई आधारभूत उपचारका लागि टाढा जानुपर्ने बाध्यता घटेको छ भने विद्यालय पहुँच पनि नजिकिएको छ। खानेपानी सुविधा अधिकांश घरधुरीमा पुगेको तथा सञ्चार सेवा विस्तारले सूचना पहुँच सहज भएको वडाध्यक्ष पुलामीको भनाइ छ।
विद्युत् विस्तारका लागि वडाका सबै टोलमा पोल गाडिसकिएको र छिट्टै बत्ती बाल्ने तयारी भइरहेको उहाँले जानकारी दिनुभयो। यसैगरी केही खोलामा पुल निर्माण भएको र झण्डै १४० भन्दा बढी घरमा जस्ता पाता फेरिएको पनि उहाँले उल्लेख गर्नु भएको छ। “सबै काम सम्पन्न भइसकेको छैन, विकास निरन्तर प्रक्रिया हो,” पुलामीले भन्नुभयो, “तर ‘केही पनि भएन’ भन्नु यथार्थ होइन। २०६५ अघिको अवस्था र अहिलेको अवस्था तुलना गरेर मात्र आलोचना गरिनुपर्छ।” उहाँले तथ्य र अध्ययनमा आधारित आलोचना सधैं स्वागतयोग्य हुने तर भ्रम फैलाउने गतिविधिले समाजलाई नकारात्मक असर पार्ने बताउनु भयो। “हामी सबैको सहकार्यबाट बाँकी काम अघि बढाउन सकिन्छ,” उहाँले थप्नुभयो।
स्थानीय स्तरमा सेवा लिनका लागि पहिले जस्तो दैनिक रूपमा सदरमुकाम धाउनुपर्ने अवस्था घटेको, विभेदका घटना कम हुँदै गएको र सामाजिक चेतनामा पनि परिवर्तन आएको उहाँको दाबी छ। वडाध्यक्ष पुलामीले निकट भविष्यमा वडामा भएका विकास गतिविधिको विस्तृत विवरण सार्वजनिक गर्ने तयारी रहेको समेत जानकारी दिनुभएको छ।
