१५ माघ, सुर्खेत-
नेकपा एमाले सुर्खेत निर्वाचन क्षेत्र नं. १ समन्वय कमिटीको चुनावी अभियान अन्तर्गतको बैठक सम्पन्न भएको छ। कमिटी अध्यक्ष कबिन्द्र कुमार के.सी.को अध्यक्षतामा सम्पन्न उक्त बैठकमा पार्टीका शीर्ष नेताहरूको उल्लेखनीय उपस्थिति रहेको थियो। बैठकमा नेकपा एमाले केन्द्रीय कमिटी सचिव तथा कर्णाली प्रदेशका माननीय मुख्यमन्त्री यामलाल कँडेल प्रमुख अतिथिका रूपमा सहभागी हुनुभएको थियो। उहाँको उपस्थितिले बैठकलाई थप राजनीतिक महत्व दिएको सहभागीहरूले बताएका छन्।
त्यसैगरी, केन्द्रीय सदस्य तथा सुर्खेत जिल्ला इन्चार्ज नवराज रावत, केन्द्रीय सदस्यहरू मोहनमाया ढकाल र पद्मा खड्का, केन्द्रीय सल्लाहकार परिषद् सदस्य चुडामणि शर्मा, प्रदेश कमिटी सचिव तथा प्रतिनिधि सभा सदस्य पदका उम्मेदवार ध्रुव कुमार शाही लगायतका नेताहरूको पनि आतिथ्यता रहेको थियो। बैठकमा क्षेत्रीय तहमा पार्टी संगठन सुदृढीकरण, चुनावी अभियानलाई प्रभावकारी बनाउने रणनीति, कार्यकर्ता परिचालन तथा आगामी कार्यक्रमहरूबारे छलफल भएको जनाइएको छ। नेताहरूले संगठनात्मक एकता, सक्रियता र जनतासँगको सम्बन्धलाई थप मजबुत बनाउँदै चुनावी तयारीलाई तीव्र बनाउने प्रतिबद्धता व्यक्त गरेका छन्। सुर्खेत क्षेत्र नम्बर १ मा नेकपा एमालेले चुनाव लक्षित कार्यक्रम अन्तरगत घरदैलो कार्यकम सँगै वडा भेला तथा मतदाता भेटघाट कार्यक्रमलाई तिब्रता दिएको छ।
