१३ माघ, सल्यान-
मातृ तथा नवजात शिशुको मृत्युदर न्यूनीकरण गर्ने उद्देश्यले वनगाड कुपिण्डे नगरपालिकामा मातृ तथा पेरिनेटल मृत्यु निगरानी तथा प्रतिकार्य (MPDSR) सम्बन्धी दुई दिने समुदायस्तरीय कार्यक्रम सम्पन्न भएको छ।
स्वास्थ्य सेवा कार्यालय सल्यानको आयोजनामा २०८२ माघ १२ गतेदेखि सुरु भएको कार्यक्रम पब्लिक हेल्थ निरीक्षक सेतु शाहीको अध्यक्षता तथा नगर प्रमुख कर्ण बहादुर बुढाथोकीको प्रमुख आतिथ्यतामा सञ्चालन भएको हो। कार्यक्रममा नगर उपप्रमुख पुरुषोत्तम आचार्य, प्रमुख प्रशासकीय अधिकृत गोकर्ण पन्थी, वडा नं. १ का वडाध्यक्ष थुम बहादुर वि.सी., वनगाड कुपिण्डे नगर अस्पतालका मेडिकल अधिकृत डा. रञ्जन रेग्मी, स्वास्थ्य शाखाका कर्मचारी तथा विभिन्न स्वास्थ्य संस्थामा कार्यरत स्वास्थ्यकर्मीहरूको सक्रिय सहभागिता रहेको थियो।
दुई दिनसम्म चलेको कार्यक्रममा मातृ तथा नवजात शिशु मृत्युका कारण पहिचान, जोखिम न्यूनीकरणका उपाय, तथ्यांक संकलन प्रक्रिया, समुदायको भूमिका तथा प्रभावकारी प्रतिकार्य संयन्त्र निर्माणका विषयमा विस्तृत छलफल गरिएको थियो। कार्यक्रम २०८२ माघ १३ गते नगर प्रमुख बुढाथोकीको प्रमुख आतिथ्यतामा सुझाव, अनुभव आदान–प्रदान तथा महत्वपूर्ण भनाइहरूसहित सम्पन्न भएको हो। सहभागीहरूले स्थानीय तहमा MPDSR कार्यक्रम प्रभावकारी रूपमा कार्यान्वयन गर्न प्रतिबद्धता जनाएका छन्। यस कार्यक्रमले मातृ तथा शिशु स्वास्थ्य सुधार तथा मृत्युदर घटाउने अभियानमा महत्वपूर्ण टेवा पुग्ने विश्वास गरिएको छ।
