१५ जेठ, सुर्खेत-
भेरीगंगा नगरपालिका सुर्खेतले नगर क्षेत्रलाई स्वच्छ, सफा तथा वातावरणमैत्री बनाउने उद्देश्यसहित फोहोरमैला व्यवस्थापनमा कडाइ गर्ने जनाएको छ। नगरपालिकाले एक सार्वजनिक सूचना जारी गर्दै नगरवासी, उद्योग, व्यवसायी तथा संघसंस्थालाई फोहोर व्यवस्थापनमा जिम्मेवार बन्न आग्रह गरेको हो।
नगरपालिकाले सार्वजनिक स्थलमा जथाभावी फोहोर फाल्ने तथा जलाउने कार्य पूर्ण रूपमा निषेध गरिएको स्पष्ट पारेको छ। साथै घर, पसल, उद्योग तथा संस्थाबाट निस्कने फोहोरलाई कुहिने, नकुहिने र स्वास्थ्यसम्बन्धी फोहोर छुट्टाछुट्टै वर्गीकरण गरेर व्यवस्थापन गर्न अनुरोध गरिएको छ। सूचनामा स्रोतमै वर्गीकरण नगरिएको फोहोर नउठाइने व्यहोरा समेत उल्लेख गरिएको छ। नगरपालिकाले सबै नगरवासीलाई सरसफाइ अभियानमा सक्रिय सहभागिता जनाउन आग्रह गर्दै स्वच्छ र स्वस्थ वातावरण निर्माणमा सहयोग गर्न अपिल गरेको छ।
त्यस्तै, फोहोरमैला व्यवस्थापन ऐन २०६८ तथा सरसफाइ एवं फोहोरमैला व्यवस्थापन निर्देशिका २०७७ अनुसार नियम उल्लंघन गर्ने व्यक्तिलाई कानुनी कारबाही तथा जरिवाना गरिने चेतावनी पनि दिइएको छ। भेरीगंगा नगरपालिकाले पछिल्लो समय वातावरण संरक्षण, सरसफाइ र व्यवस्थित फोहोर व्यवस्थापनलाई प्राथमिकतामा राख्दै विभिन्न कार्यक्रम सञ्चालन गर्दै आएको जनाएको छ।
