२ फागुन,सुर्खेत-
सुर्खेतको सिम्ता गाउँपालिकामा आजदेखि १६ औं जिल्ला स्तरीय राष्ट्रपति रनिङ शिल्ड प्रतियोगिता आज शुक्रवारदेखि सुरु भएको छ । जिल्ला खेलकुद समिति सुर्खेतको मुख्य आयोजना र बागेश्वरी मावि सिम्ता -६ राकमको सह आयोजना सुरु भएको रनिङ शिल्ड प्रतियोगितामा सुर्खेत जिल्लाका सबै पालिका हरुले सहभागिता जनाएका छन्।
प्रतियोगितालाई सम्बोधन गर्दै मुख्यमन्त्री यामलाल कँडेलले कम स्रोत र साधनबीच खेलाडीहरूले आफ्नो मेहनतले देशलाई नै विश्वसामु चिनाएको बताउनु भएको थियो। विद्यालयमा रहेका हरेक विद्यार्थीहरूलाई खेलकुदका माध्यमबाट असल नागरिक बनाउन सकिने हुँदा खेलकुद महत्त्वका साथ सबैले हेर्नू पर्ने मुख्यमन्त्री कँडेलले बताउनु भएको थियो। खेल क्षेत्र लगाएतका अन्य क्षेत्रको विकास गर्नका लागि जनतादेखि राजनीति दल मिल्नुको विकल्प नभएको समेत मुख्यमन्त्री कँडेलको भनाई थियो।
साथै, सामाजिक विकास मन्त्री घनश्याम भण्डारीले खेलकुद क्षेत्रको विकासका लागि अनवरत पहल भइरहेको बताउनु भएको थियो। खेलाडीको जीवन रक्षाका निमित्त आगामी आर्थिक वर्षदेखि लागू हुनेगरी कर्णालीका सबै खेलाडीहरूको बीमा प्रदेश सरकारले गरिदिने उहाँले प्रतिबद्दता व्यक्त गर्नु भएको थियो। साथै, उहाँले दशौं राष्ट्रिय खेलकुद आयोजनाका लागि आवश्यक बजेट व्यवस्थापन गर्न खेलकुद मन्त्रालय र अर्थ मन्त्रालयबाट आजै निर्णय हुँदै गरेको बारे जानकारी गराउँदै पूर्व प्रस्तावित मितिमै दशौं राष्ट्रिय खेलकुद आयोजना हुनेमा विश्वास व्यक्त गर्नु भएको थियो।
उद्घाटनमा कार्यक्रममा कर्णाली प्रदेशका मुख्यमन्त्री यामलाल कँडेल, सामाजिक विकास मन्त्री घनश्याम भण्डारी, प्रदेश सभा सदस्य खड्गबहादुर पोखरेल, गाउँपालिकाका अध्यक्ष ऐन बहादुर चन्द ,पालिका उपाध्यक्ष गोमा शर्मा रेग्मी, बुद्धिजीवी,पत्रकार,खेलाडी बिद्यार्थी खेलप्रेमी लगायतको सहभागी रहेको थियो।
