८ चैत, सुर्खेत-
सल्यानको कालिमाटी गाउँपालिकाले पालिकास्तरीय खेलकुद प्रतियोगिता ‘पालिका कप’ सञ्चालन गर्ने भएको छ। गाउँ कार्यपालिकाको कार्यालय रामपुर, सल्यानले जारी गरेको सूचनाअनुसार युवा तथा खेलकुद क्षेत्रको विकास, खेल प्रतिभाको पहिचान र अनुशासन तथा स्वस्थ प्रतिस्पर्धाको भावना अभिवृद्धि गर्ने उद्देश्यले प्रतियोगिता आयोजना गर्न लागिएको हो।
गाउँपालिकाका अनुसार प्रतियोगिता चैत १५ गतेदेखि चैत १७ गतेसम्म सञ्चालन हुनेछ। जसका लागि चैत १४ गतेभित्र नामावली पेश गर्नु पर्नेछ। प्रतियोगितामा फुटबल, क्रिकेट र भलिबल गरी तीन विधाका खेलहरू समावेश गरिएका छन्। प्रत्येक वडाबाट खेलाडी टोली छनोट गरी तोकिएको समयसीमा भित्र नामावली पेश गर्न पनि अनुरोध गरिएको छ। प्रतियोगितामा विजेता तथा उपविजेता टोलीका लागि आकर्षक नगद पुरस्कारको व्यवस्था गरिएको छ। फुटबल, क्रिकेट र भलिबल तीनै विधामा विजेताले ६० हजार रुपैयाँ र उपविजेताले ४० हजार रुपैयाँ प्राप्त गर्नेछन्। पुरस्कार रासिमा नियमानुसार करकट्टी गरिनेछ।
गाउँपालिकाले जारी गरेको सूचनामा सहभागी खेलाडीहरू कालिमाटी गाउँपालिकाभित्रका स्थायी बासिन्दा हुनुपर्ने, खेलाडीले नागरिकता अनिवार्य पेश गर्नुपर्ने र प्रत्येक वडाबाट विधाअनुसार टोली गठन गरी पठाउनुपर्ने उल्लेख गरिएको छ। साथै, टोली दर्ता शुल्क एक हजार रुपैयाँ तोकिएको छ। सवै खेलहरु शारदा जनकल्याण माध्यमिक विद्यालयको प्राङ्गनमा हुनेछन।
सबै खेलहरू श्री शारदा जनकल्याण माध्यमिक विद्यालय, रामपुर सल्यानको खेलमैदानमा सञ्चालन हुने जनाइएको छ। गाउँपालिकाले सम्बन्धित सबै वडा कार्यालयलाई सूचना प्रवाह गर्न पनि आग्रह गरेको छ। प्रतियोगिताले स्थानीय स्तरमा खेलकुद गतिविधि बढाउँदै युवामा सकारात्मक ऊर्जा र सहकार्यको भावना विकास गर्ने अपेक्षा गरिएको छ।
