६ फागुन, सुर्खेत–
सुर्खेतको सिम्तामा आठौँ सिम्ता गाउँपालिका स्तरीय राष्ट्रपति रनिङ शिल्ड छनौट प्रतियोगिता बागेश्वरी माध्यमिक विद्यालय राकममा भव्य रूपमा उद्घाटन गरिएको छ। प्रतियोगिताको उद्घाटन (कर्णाली प्रदेशसभा सदस्य) खड्क बहादुर पोखरेल को प्रमुख आतिथ्यता, ऐन बहादुर चन्द (गाउँपालिका अध्यक्ष) र गोमा शर्मा (रेग्मी) (उपाध्यक्ष)को विशेष आतिथ्यतामा सम्पन्न भयो। उद्घाटन समारोह गुलाब सिंह ठकुरी (वडा नं. ६का वडाध्यक्ष )को अध्यक्षतामा सम्पन्न भएको हो।
फाल्गुन ६ गते (आज) देखि ८ गतेसम्म सञ्चालन हुने प्रतियोगितामा सिम्ता गाउँपालिकाभित्रका माध्यमिक तहका १२ वटा सामुदायिक विद्यालयको सहभागिता रहेको छ। उद्घाटन दिनका खेल नतिजाअनुसार, छात्र भलिबलतर्फ बागेश्वरी मावि राकम र मावि खेल्नेचौरबीच भएको प्रतिस्पर्धामा बागेश्वरी मावि राकमले २–० को सोझो सेटमा विजय हासिल गर्यो। छात्रा कबड्डीतर्फ बागेश्वरी मावि राकम विजेता र मावि काप्रीचौर उपविजेता बने। एथलेटिक्सतर्फ १५०० मिटर छात्र/छात्रा र ८०० मिटर छात्र इभेन्टहरू सम्पन्न भएका छन्।आयोजकका अनुसार, भोलि बिहान ७:०० बजेदेखि सबै इभेन्टका खेलकुद कार्यक्रमहरू नियमित रूपमा सुचारु हुनेछन्। सिम्ता गाउँपालिका शिक्षा, युवा तथा खेलकुद शाखाको आयोजना एवं श्री बागेश्वरी माध्यमिक विद्यालय, राकम, सुर्खेतको सह-आयोजनामा आठौँ गाउँपालिका स्तरीय राष्ट्रपति रनिङ शिल्ड छनौट प्रतियोगिता सुरु भएको हो।
