२४ बैशाख, सुर्खेत ।
सुर्खेतको गुर्भाकोट नगरपालिका वडा नं. १ खेत्यान निवासी ४३ वर्षीया अनिता कार्की विगत एक सातादेखि सम्पर्कविहीन भएपछि परिवारले खोजी कार्यमा सहयोग गरिदिन सर्वसाधारणसँग आग्रह गरेको छ ।
परिवारका अनुसार अनिता कार्की यही बैशाख १७ गते बिहान करिब ७ बजेतिर घरबाट निस्किनुभएको थियो । उहाँले श्रीमानसँग “बोटेचौर लघुवित्तमा ऋण सम्बन्धी कामका लागि जान्छु र छोराको कपडा सिलाउन पनि जानुपर्ने छ” भनेर घरबाट निस्किनुभएको परिवारले जनाएको छ । त्यसयता उहाँ हालसम्म परिवार तथा आफन्तको सम्पर्कमा नआएको श्रीमान तिलक कार्कीले जानकारी दिनुभएको छ ।
परिवारले आफन्त, चिनेजानेका व्यक्तिहरू तथा सम्भावित स्थानहरूमा खोजी गर्दा पनि उहाँको अवस्था र स्थानबारे कुनै जानकारी प्राप्त हुन नसकेको जनाएको छ । यसैबीच, सामाजिक सञ्जाल टिकटकमा बैशाख १९ र २१ गते अपरिचित पुरुषसँग देखिएको केही भिडियो सार्वजनिक भएको परिवारको दाबी रहेको छ । यद्यपि ती भिडियोको वास्तविकता तथा हालको अवस्थाबारे आधिकारिक पुष्टि भने हुन सकेको छैन ।
घटनापछि परिवारले स्थानीय स्तरमा खोजी कार्य तीव्र बनाएको छ भने आवश्यक समन्वयका लागि प्रहरीलाई समेत जानकारी गराइएको बताइएको छ । परिवारजन अहिले अत्यन्त चिन्तित अवस्थामा रहेका छन् ।
यदि कसैले अनिता कार्कीलाई कहीँकतै देख्नुभएको वा उहाँको अवस्थाबारे कुनै जानकारी पाउनुभएको छ भने नजिकको प्रहरी चौकीमा जानकारी गराइदिन वा मोबाइल नम्बर ९७०७३०६५२२ मा सम्पर्क गरि सहयोग गरिदिन परिवारले अनुरोध गरेको छ ।
